आजदेखि यी स्थानमा खुल्यो सुपथ मूल्य पसल, कुन सामानमा कतिसम्म छुट ? 

काठमाडौं- दसैं, तिहार, छठलगायतका पर्वलाई लक्षित गरेर सरकारले आजदेखि  राजधानीका विभिन्न ठाउँमा सुपथ मूल्य पसल सञ्चालनमा ल्याएको छ। 

खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन लिमिटेडका कार्यालय, डिपो, डिलरहरुले घुम्ती सेवा पसल सञ्चालनमा ल्याएका हुन् । यस्ता पसलबाट अनलाइनमार्फत पनि किनमेल गर्न सकिने उद्योग, वाणिज्य तथा आपूर्ति मन्त्रालयले जनाएको छ। 

उपत्यकाका कालीमाटी, कोटेश्वर, टेकु, सिंहदरबार, सतुंगल, थापाथली, नख्खु, प्रयागपोखरी, जाउलाखेललगायतका ठाउँमा घुम्ती सेवा पसल सञ्चालनमा आएका छन् । 

सुपथ पसलमा उपभोक्ताले सरल, सहज एवम् सहुलियत मूल्यमा दैनिक उपभोग्य अत्यावश्यक खाद्य वस्तुहरु चामल, चिनी, नुन, दाल, खसी, च्याङ्ग्रा लगायतमा छुट पाउने छन्। 

यस्ता पसलमा नुन प्रतिकिलो १८ रुपैयाँ, चिनी प्रतिकिलो ७० रुपैयाँ, घिउ  प्रतिकिलाे ८७० रुपैयाँ ताेकिएकाे छ। त्यस्तै चामलमा  प्रतिकिलाे पाँच रुपैयाँ छुट दिइएको छ। 

खसी, बोका र च्याङ्ग्रामा प्रतिकिलाे १० रुपैयाँ, दालमा पाँच रुपैयाँ, गेडागुडीमा १० रुपैयाँ, फापर तथा केराउमा पाँच रुपैयाँ छुट दिइएकाे मन्त्रालयले जनाएकाे छ।

चाडपर्वमा उपभोक्तालाई थोरै भए पनि मूल्यमा राहत दिने उद्देश्यले सरकारले हरेक वर्ष यस्ता सहुलियत मूल्य पसल सञ्चालन गर्ने गरेको छ। यो वर्ष पनि त्यसैको निरन्तरता हो ।