विराटनगर– दशैं, तिहार, छैठ लगायतका चाडपर्वलाई लक्षित गरेर जिल्ला प्रहरी कार्यालय मोरङले विशेष सुरक्षा योजना तयार पारेको छ ।
सम्भावित र विगतमा भएका घटना एवं आपराधिक गतिविधीलाई मध्यनजर गर्दै तयार पारिएको सुरक्षा योजना प्रभावकारी रुपमा कार्यान्वयनतर्फ लैजान थालिएको मोरङ प्रहरी प्रमुख एसपी सन्तोष खड्काले बताए । सुरक्षा योजनामा एसपी खड्का आफै सुरक्षा व्यवस्थापनमा खटिने उल्लेख छ ।
प्रदेश राजधानी विराटनगर लगायतका स्थानमा विशेष ढंगले प्रहरी परिचालन गरेर सुरक्षा व्यवस्था मिलाउन थालिएको उनको भनाइ छ । खड्काका अनुसार धार्मिक तीर्थस्थल, शक्तिपीठ, मठ मन्दिर लगायत भक्तजनहरुको भीडभाड एवं घुइँचो हुने स्थानको सुरक्षा व्यवस्था मिलाउन निगरानी बढाउन थालिएको छ ।
भीडभाडमा हुने चोरी, डकैती र लुटपाटका घटना हुन नदिन प्रहरी चनाखो रहेको उनको भनाइ छ । मादक पदार्थ सेवन (मापसे)बाट हुने झैझगडा एवं अपराध नियन्त्रण, कालो बजारी, इन्धन तथा दैनिक उपभोग्य वस्तुको कृतिम अभाव लगायतमा पनि प्रहरीले ध्यान दिन थालेको छ ।
चाडपर्वमा यातायातको सहज उपलब्धता, चुस्त ट्राफिक व्यवस्थापन, तस्करी, हातहतियार तथा लागुऔषधको अवैध ओसार पसार नियन्त्रणमा अहिल्यैदेखि प्रहरी सक्रिय भएको छ । बैंक तथा वित्तिय संस्था, आर्थिक गतिविधी एवं सुनचाँदीको कारोबार बढी हुने स्थान, सरकारी कार्यालय, एटीएम बुथ र पसलहरुमा निरानी बढाउन प्रहरीको विशेष टोली खटाइएको छ ।
शंकास्पद व्यक्तिहरु एवं सार्वजनिक स्थलमा हुने गतिविधीको निगरानी, पटकाको ओसारपसार तथा बेचबिखन नियन्त्रण, सीमा क्षेत्रमा कडाई, मदिराको ओसारपसार, पकेटमार लगायत अपराधिक प्रवृत्तिका मानिसहरुको पहिचान प्रहरीको प्राथमिकतामा परेका छन् ।
मादक पदार्थ सेवन (मापसे) गरेर सार्वजनिक स्थलहरुमा हो–हल्ला एवं झै–झगडा गर्नेलाई तत्काल नियन्त्रणमा लिएर प्रहरीले कारबाही अघि बढाउने छ । यसका लागि अवैध मदिरा ओसारपासर र बेचबिखनलाई प्रहरीले पूर्ण निगरानीमा राखेको एसपी खड्काले बताए ।
मोरङमा एक हजार दुई सय ३३ प्रहरी चाडपर्व सुरक्षाका लागि आवश्यक पर्ने देखिएको छ । नौ सय ६० जना जिल्लाभित्रबाटै खटाउन सकिने र अरु दुई सय ७३ जना माथिल्लो कार्यालयबाट माग गरिएको छ ।