काठमाडौं– सत्तारुढ दल नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहालबीच भेटवार्ता भइरहेको छ।
प्रधानमन्त्री निवास बालुवाटारमा केहीबेर अघिदेखि दुई अध्यक्षबीच छलफल भइरहेको छ। मन्त्रिपरिषद् पुनर्गठन र संवैधानिक नियुक्तिका बारेमा छलफल गर्न अध्यक्षद्वयबीच भेट भएको हो।
आइतबार र मंगलबार बसेको नेकपाको सचिवालय बैठकले मन्त्रिपरिषद् पुनर्गठन र संवैधानिक नियुक्तिका बारेमा टुंगोमा पुग्न प्रधानमन्त्रीलाई आग्रह गरेको थियो।
प्रधानमन्त्री केपी शर्मा ओलीले मन्त्रिपरिषद् पुनर्गठनको आन्तरिक तयारी गरिरहेका बेला अर्का अध्यक्षसँग छलफलमा जुटेका हुन्। उनीहरुबीच सोमबार पनि छलफल भएको थियो।
सचिवालयका अन्य नेताहरुले पनि मन्त्रिपरिषद् पुनर्गठनका विषयमा आ–आफ्नो धारणा बैठकमा राखिसकेका छन्। २६ भदौमा सम्पन्न नेकपाको स्थायी कमिटी बैठकले पनि मन्त्रिपरिषद् पुनर्गठन लगायतका विषयमा निर्णय गरेको थियो। आवश्यक मापदण्ड बनाएर पुनर्गठन गर्ने नेकपाले निर्णय गरे पनि कस्तो मापदण्डका आधारमा गर्ने भन्ने सार्वजनिक गरिसकेको छैन।
स्रोतका अनुसार नेताहरुबीच यस विषयमा सहमति भइसकेको छ। आइतबार र मंगलबारको सचिवालय बैठकमा नेताहरुले दुई वर्षे अवधि गुजारेकालाई बिदा दिने, अहिलेसम्म अवसर नपाएकाहरुलाई स्थान दिने लगायतका विभिन्न विकल्पमा छलफल गरिसकेका छन्।
मन्त्रिपरिषद्मा अहिले अर्थ, सञ्चार तथा सूचना प्रविधि र सहकारी विकास मन्त्रालय खाली छन्। ती तीनवटा मन्त्रालयमा नयाँ मन्त्री नियुक्त गर्नुका साथै अन्यलाई कसरी समावेश गर्न सकिन्छ भन्ने विषयमा प्रधानमन्त्रीले अर्का अध्यक्ष दाहाल र नेताहरुसँग छलफल गरिसकेको बालुवाटार स्रोतले जानकारी दिएको छ।