काठमाडौं- मंगलबारदेखि लगातार परेको वर्षाका कारण देशका विभिन्न खोलामा बाढीको जोखिम बढेको छ ।
बाढी पूर्वानुमान महाशाखाका अनुसार आगामी तीन दिन सबै नदीमा पानीको बहाब बढ्ने छ भने खहरे खोलाहरुमा ठूलो बाढी आउन सक्नेछ । आज तिनाउ, पश्चिम राप्ती, बबई, कालीगण्डकीमा पानीको बहाव उच्च हुने महाशाखाले जनाएको छ ।
यी बाहेक अन्य ठूला तथा साना खोलाहरुमा पनि बाढीको जोखिम उच्च बनेको छ । अधिकांश नदीहरुमा भोलि सतर्कताको स्तरमा र पर्सि (शुक्रबार) खतराको स्तरमा पुग्न सक्ने महाशाखाले जारी गरेको सूचनामा उल्लेख छ ।
तटिय क्षेत्रमा अतिउच्च सतर्कता अपनाउन पनि महाशाखाले अनुरोध गरेको छ ।
यस्तै बाढी पूर्वानुमान महाशाखाका अनुसार लगातार भइरहेको वर्षाका कारण प्रदेश १ को इलाम, झापा, मोरङ, सुनसरी, धनकुटा उदयपुर र भोजपुर प्रभावित हुने भएको छ ।
प्रदेश २ को सबै जिल्ला, बाग्मति प्रदेशको दोलखा, सिन्धुली, मकवानपुर, चितवन, काभ्रे, सिन्धुपाल्चोक र काठमाडौं उपत्यका पनि प्रभावित हुने भएको छ ।
गण्डकी प्रदेशको गोरखा, लमजुङ, तनहुँ, कास्की, पर्वत, म्याग्दी र बाग्लुङ बढी प्रभावित हुने देखिएको छ भने प्रदेश ५को पाल्पा, गुल्मी, अर्घाखाँची, रुपन्देही, कपिलवस्तु, रोल्पा, रुकुम, प्युठान र दाङ वर्षाका कारण प्रभावित हुने बाढी पूर्वानुमान महाशाखाले जनाएको छ ।
कर्णाली र सुदुरपश्चिका जिल्लाहरु भने कम प्रभावित हुने महाशाखाले जारी गरेको सूचनामा उल्लेख छ ।