काठमाडौं- सवारी चालकसँग घुस खाने काठमाडौं उपत्यकाका ८१ जना ट्राफिक प्रहरी कारबाहीमा परेका छन् ।
जसमध्ये ७७ जना ट्राफिक प्रहरीलाई विभागीय कारवाही गरिएको छ भने अन्य ४ प्रहरीलाई सेवाबाटै बर्खास्त गरिएको महानगरीय ट्राफिक प्रहरी महाशाखा प्रमुख प्रहरी वरिष्ठ उपरीक्षक भीमप्रसाद ढकालले जानकारी दिए ।
यस्तै सवारी नियम उल्लङ्न गर्ने चालक र सहचालकले आर्थिक प्रलोभनमा पार्न खोज्दा त्यसलाई इन्कार गर्ने १७ ट्राफिक प्रहरीलाई भने सम्मान गरिएको छ।
महानगरीय ट्राफिक प्रहरी महाशाखामा आयोजित कार्यक्रममा उनीहरुलाई महाशाखाका प्रमुख प्रहरी वरिष्ठ उपरीक्षक भीमप्रसाद ढकालले दोसल्ला ओढाएर प्रशंसापत्रसहित सम्मान गरेका हुन् ।
यसअघि पनि प्रलोभनमा नपर्ने ५० ट्राफिक प्रहरीलाई महाशाखाले पुरस्कृत गरेको थियो।