ग्वार्डिओलालाई सिजनको पहिलो सफलता

काठमाडौं- इंग्लिस प्रिमियर लिग(ईपीएल)मा प्रशिक्षक पेप ग्वार्डिओलोका टिम म्यानचेस्टर सिटीले पहिलो जित निकालेको छ। वुभ्स्को मोलिनेक्स रंगशालामा सम्पन्न खेलमा सिटीले घरेलु टिमलाई ३-१ गोलअन्तरले हराएको हो।

जितका लागि केभिन डि ब्रुन, फिल फोडेन र ग्याब्रियल जेससले गोल गरे। खेलको २० औं मिनेटमा वुल्भ्सका डिफेन्डरले डि ब्रुनलाई लडाएपछि सिटीले पेनाल्टी पाएको थियो। सोही अवसरको सदुपयोग गर्दै डि ब्रुनले पहिलो गोल गरे।

३२ औं मिनेटमा रहिम स्टार्लिङले दिएको पासलाई सदुपयोग गर्दै फिल फोडेनले गोल गरे। पहिलो हाफमै दुई गोलले अघि रहेको टिमले दोस्रो हाफमा पनि एक गोल थप्यो।

डि ब्रुनको पासमा ग्याब्रियल जेससले अतिरिक्त समयमा गोल गर्दै सिटीको खातामा तीन गोल जम्मा गरे। त्यसअघि, ७८ औं मिनेटमा वुल्भ्सका राउल जिमिनेजले सान्त्वना गोल गरे।

सोमबार रातिको खेलमा जित निकाल्दै सिटीले तीन अंक जोडेको छ भने दोस्रो खेलमा पराजित वुल्भ्सले पहिलो खेल जित्दै तीन अंक जोडिसकेको छ।

इंग्लिस प्रिमियर लिगमा आज कुनै खेल छैनन्।