पर्वत– पहिरोको जोखिममा परेका पर्वतको फलेवास नगरपालिकाका सात वटा बस्ती स्थानान्तरण गर्न सिफारिस गरिएको छ।
नगरपालिकाको विपद् व्यवस्थापन समितिले बस्ती स्थानान्तरण गर्न संघ र प्रदेश सरकारसमक्ष सिफारिस गरेको हो।
वर्षाले पहिरो जाने, जमिन चर्किने र धाँजा फाट्ने समस्या देखिएकोले सात वटा बस्तीका झण्डै १०० घरपरिवार जोखिममा परेको नगरप्रमुख पदमपाणी शर्माले जानकारी दिए।
समितिका अनुसार वडा नं ४ मुडिकुवाको चुरी, वडा नंं १० कुर्घाको फल्ला, वडा नं २ थापाठानाको दरदरे, वडा नं ३ शङ्करपोखरीको पुर्कोट, सोही वडाको रुग्दी र वडा नं ६ देवीस्थानको राहले बस्ती स्थानान्तरण गर्न सिफारिस गरिएको छ।
सबैभन्दा बढी कुर्घामा २५ घर र चुरीमा २० घर जोखिममा छन्।
सिफारिस पठाए पनि नगरबाट सम्बोधन हुनसक्ने ठाउँमा भने नगरले नै योजना बनाएर पुनःस्थापनाका कार्य अघि बढाउने शर्माले बताए।
–रासस