काठमाडौं– प्रमुख प्रतिपक्षी दल नेपाली कांग्रेसका सभापति शेरबहादुर देउवाको सचिवालयमा कार्यरत एक कर्मचारीमा कोरोना संक्रमण देखिएको छ।
देउवाका सहयोगी भानु देउवाले सचिवालयमा कार्यरत एक कर्मचारीमा कोरोना संक्रमण पुष्टि भएको जानकारी दिए। ‘कर्मचारीमा संक्रमण पुष्टि भएपछि सभापतिज्यू आजदेखि होम क्वारेन्टिनमा बस्नुभएको छ,’ सहयोगी देउवाले भने।
कर्मचारीमा संक्रमण देखिएपछि सभापति देउवा कन्ट्याक्ट टे«सिङमा परेका हुन्। उनको भोलि स्वाब संकलन गरेर परीक्षण गरिने छ।
सचिवालयमा कार्यरत रहेका अन्य कर्मचारीहरुको भने परीक्षण रिपोर्ट नेगेटिभ देखिएको छ। सभापति देउवा आज बालुवाटारमा हुने भनिएको छलफलमा सहभागी हुने कार्यक्रम थियो।
प्रमुख प्रतिपक्षी दलकै नेता बैठकमा सहभागी हुन नसक्ने भएपछि उक्त बैठक बस्ने वा नबस्ने केही टुंगो लागेको छैन।