सिरी एमा युभेन्टसले निकाल्यो पहिलो जित

काठमाडौं- इटालियन फुटबल लिग सिरी एको नयाँ संस्करणमा युभेन्टसले पहिलो जित निकालेको छ। दुई सिजन अघिसम्म लगातार नौ पटकको विजेता बनेको युभेन्टसले यो सिजनका सुरुआति चार खेलमै जित निकाल्न सकेको थिएन।

उसले पछिल्लो चार खेलसम्म दुई हार र दुई बराबरीको सामना गरिसकेको थियो। यससँगै दुई अंक बनाएर युभेन्टस रेलिगेसन जोनमा पुगिसकेको थियो।

यता बुधबार रातिको खेलमा उसले स्पेजियाविरुद्ध संघर्षपूर्ण जित निकाल्दै तीन अंक जोडेर तालिकामा पाँच अंक बनाउँदै १३औं स्थानमा उक्लिएको हो।

युभेन्टसको जितका लागि मोइसे किन, फेडेरिको किएजा र माथ्थिउस डि लिग्टले गोल गरेका थिए।

पहिलो हाफको २८औं मिनेटमा किनले बनाएको अग्रता ३३औं मिनेटमा स्पेजियाका इम्यानुयल गयसीले तोडेका थिए। यससँगै पहिलो हाफ बराबरीमा रोकिएको थियो।

दोस्रो हाफमो जेन्सले ४९औं मिनेटमा गोल गर्दै स्पेजियालाई २–१ गोलको अग्रता दिलाए पनि त्यसपछि केइजा र डि लिग्टले गोल गर्दै युभेन्टसलाई ३–२ गोलको जित दिलाए। स्पेजिया अहिले १७औं स्थानमा छ।