काठमाडौं– केही सातायता काठमाडौं उपत्यकामा कोरोना संक्रमितको संख्या बढ्दो क्रममा छ।

इपिडिमियोलोजी तथा रोग नियन्त्रण महाशाखाका अनुसार अहिले उपत्यकामा ५ हजार ६६६ जना सक्रिय संक्रमित छन्।

यीमध्ये १ हजार ७७८ जना विभिन्न अस्पतालमा उपचाररत छन्। अस्पतालका आइसोलेसनमा १ हजार ६८०, आईसीयूमा ७७ र भेन्टिलेटरमा २१ जना रहेको महाशाखाले जनाएको छ।

बाँकी संक्रमित होम आइसोलेसन तथा संस्थागत आइसोलेसनमा छन्।

उपत्यकामा संक्रमितमध्ये ५९ जनाको मृत्यु भएको छ।

कोरोना संक्रमितको संख्या बढ्दै गएपछि स्वास्थ्य तथा जनसंख्या मन्त्रालयले लक्षण नभएकालाई घरमै आइसोलेसनमा बस्न अनुमति दिएको छ। लक्षण देखिएका तथा गम्भीर बिरामीमात्रै अस्पतालमा भर्ना हुन पाउँछन्।

काठमाडौं उपत्यकामा हालसम्म ९ हजार ४४० जनामा संक्रमण पुष्टि भएकोमा ३ हजार ७१७ जना संक्रमणमुक्त भएका छन्।

संक्रमणमुक्त हुनेमा काठमाडौंका २ हजार ९५४, भक्तपुरका ३०१ र ललितपुरका ४६४ जना छन्।

उपत्यकाका १९ अस्पतालमा एक हजार ७७८ कोरोना संक्रमित उपचाररत