काठमाडौं- विश्वव्यापी महामारीको रुपमा फैलिएको कोरोना भाइरसबाट विश्वभर ९ लाख बढीको मृत्यु भएको छ ।
विश्वमा कोरोना संक्रमण देखिएको १० महिनामा ९ लाखको मृत्यु भएको हो ।
पछिल्लो एक महिनामा मात्रै १ लाख ७० हजार ५ सयभन्दा धेरैको मृत्यु भएको छ । पछिल्लो चार महिनामा मृत्युदर अध्याधिक मात्रामा बढेको विश्व स्वास्थ्य संगठन डब्लुएचओले जनाएको छ ।
कोरोनाबाट सबैभन्दा बढी अमेरिका प्रभावित भएको छ । जहाँ बिहीबार बिहानसम्म ६३ लाख ५८ हजारभन्दा बढी संक्रमित भएका छन् भने १ लाख ९० हजार ७ सयभन्दा बढीको मृत्यु भएको छ ।
दोस्रो बढी प्रभावित भारतमा कोरोना संक्रमितको संख्या ४३ लाख ७० हजारभन्दा बढी पुगेको छ भने ७३ हजार ८ सय ९० जनाको कोरोनाकै कारण मृत्यु भएको छ ।
त्यस्तै ब्राजिलमा ४१ लाख ६२ हजार संक्रमित भएका छन् भने १ लाख २७ हजार ४ सयभन्दा बढी मृत्यु भएको छ ।
यस्तै जोन हपकिन्स विश्वविद्यालयका अनुसार कोरोनाबाट मेक्सिकोमा ६९ हजार ४९, बेलायतमा ४१ हजार ६ सय ८३, इटालीमा ३५ हजार ५ सय ७७, फ्रान्समा ३० हजार ८ सय ५, पेरुमा ३० हजार १ सय २३, स्पेनमा २९ हजार ७ सय २८ जनाको मृत्यु भएको छ ।
इरानमा २२ हजार ६ सय, कोलम्बियामा २१ हजार ८ सय, रुसमा १८ हजार ८०, चिलीमा ११ हजार ७ सय, अर्जेन्टिमा १० हजार ७ सय जनाको कोरोनाबाट मृत्यु भएको छ ।
नेपालमा भने कोरोना संक्रमणबाट ३ सय १२ जनाको मृत्यु भएको छ । अहिलेसम्म नेपालमा ४९ हजार २ सय १९ जनामा संक्रमण पुष्टि भएको छ भने ३३ हजार ८ सय ८२ जना निको भएका छन् ।