दुई टुक्रा भएको हात १० घण्टाको शल्यक्रियापछि जोडियो

काठमाडौं– मेसिनले दुई टुक्रा बनाइदिएको हत्केला राष्ट्रिय ट्रमा सेन्टरमा सफल रुपमा जोडिएकोे छ।

दक्षिणकालीस्थित एक कारखानामा फ्लेक्सको काम गर्दा सर्लाहीका १८ वर्षीय रवि सिंहको हात मेसिनले दुई टुक्रा बनाइदिएको थियो। टुक्रा भएको हत्केला बोकेर रवि आफैं ट्रमा सेन्टर पुगेका थिए।

फ्लेक्स पाइप मेसिनले दुई टुक्रा बनाइदिएको हत्केलालाई प्लास्टिक सर्जरी विभाग प्रमुख प्रा.डा. पियूष दाहालको नेतृत्वमा रहेको चिकित्सक टोलीले १० घण्टा लामो शल्यक्रिया गरी जोडिदिएका हुन्।

सर्जरीका क्रममा प्लास्टिक सर्जन डा. कृष्ण मानन्धरले १८ वटा चलाउने नशा, ५ वटा भेन, ३ वटा आर्टरी र ४ वटा हड्डी जोड्नुपरेको चिकित्सकहरुले बताएका छन्।

रविले घटनालगतै टुक्रा भएको हातलाई सफा गरेर ल्याएकोले कुनै संक्रमण हुन नपाएको चिकित्सकले बताएका छन्।

सर्जरीमा प्रा.डा. दाहाल र डा मानन्धरसहित अर्का प्लास्टिक सर्जन डा. अपार लामिछाने, डा. छिरिङ शेर्पा, एनेस्थेसियाका डा. रुपेश यादव, प्लास्टिक सर्जरी रेजिडेन्ट डा. कमलराज पाठक, नर्सिङ टिमकी पिङ्की लागेजु र अनुपमा फुयालको सहभागिता थियो।

बेलुका ७ बजेदेखि सुरु गरी १० घण्टामा जोडिएको बताइएको छ।