काठमाडौं– बार्सिलोनाका कप्तान लियोनेल मेस्सी बुधबारदेखि सामूहिक प्रशिक्षणमा सहभागी भएका छन्। पछिल्लो साता उनी प्रशिक्षणबाट बाहिर थिए।
स्पेनिस ला लिगाले जारी गरेको कोरोना भाइरस प्रोटोकलका कारण उनी सोमबार र मंगलबार अभ्यासमा उपस्थित भए पनि सामूहिक अभ्यासमा थिएनन्।
त्यसअघि उनी क्याटलान क्लबबाट इंग्लिस क्लबमा जाने इच्छा देखाउँदै प्रशिक्षणमा उपस्थित भएका थिएनन्।
उनी बुधबार डच प्रशिक्षक रोनाल्ड कोयमेनसँग पहिलोपटक प्रशिक्षणमा सहभागी भए। मेस्सीको शारीरिक अवस्था हेरेर उनी शनिबारको प्रि–सिजन मैत्रीपूर्ण खेलमा सहभागी हुने वा नहुने बारे टुंगो लाग्ने बार्सिलोनाले जनाएको छ।
अभ्यासका क्रममा पर्याप्त गति लिन नसके उनी खेलमा सहभागी हुने छैनन्। आउँदो सिजनको तयारीका लागि तारागोना क्लबसँग मैत्रीपूर्ण खेल्ने योजना बार्सिलोनाकाे छ।
मेस्सीसँगै फिलिप काउटिन्हो, सर्जियो बस्क्वेट, फ्रांकी डि जोङ र अन्सु फाती पनि प्रशिक्षणमा सहभागी भए। तर फ्रेन्च स्टार क्लेमेन्ट लेन्गेट र एन्टोनी ग्रिजम्यान भने नेसन्स लिगमा समावेश भएर फर्किएका छैनन्।