२५ भदौभित्र कर तिर्न सरकारले गरेको ताकेता जनविरोधी : कांग्रेस

काठमाडौं– प्रमुख प्रतिपक्ष दल नेपाली कांग्रेसले कोरोना महामारीले लामो समयदेखि व्यवसाय ठप्प भएको समयमा सरकारले कर तिर्न गरेको ताकेता जनविरोधी काम भएको आरोप लगाएको छ।

कांग्रेसको उद्योग तथा व्यापार विभागले मंगलबार प्रेस विज्ञप्ति जारी गर्दै सरकारले कर उठाउनकै लागि बैंक खुला गर्न र २५ गतेभित्रै कर भुक्तानी गर्न गरेको ताकेता जनविरोधी र अव्यवहारिक भएको जनाएको हो।

निषेध आदेशको समयमा कर दाखिला गर्न सरकारले दिएको आदेशको विरोध गर्दै विज्ञप्तिमा भनिएको छ, ‘राज्यले अभिभावकीय भूमिका निर्वाह गर्नुपर्ने बेला आलो घाउमा नुनचुक छर्ने बाहेक केही गरेको छैन।’

यस्तो अलोकतान्त्रिक र व्यवसायी विरोधी निर्देशन सच्याएर निषेध आदेशपछि एक महिनाभित्र करदाताले कर विवरण तथा कर दाखिला गर्ने गराउने व्यवस्था मिलाउन पनि कांग्रेसले माग गरको छ।