शुक्रबार, मंसिर १९, २०७७

समाचार

पर्वतको कुश्मामा अग्लो स्विङ र दोस्रो अग्लो बन्जी

1603953204.jpg

पोखरा–पर्वत सदरमुकाम नजिकै भएर बग्छन् कालीगण्डकी र मोदी । यी दुई नदीको संगम हो मोदीबेनी। जुन हिन्दुहरुको पवित्र तीर्थस्थल पनि हो। 

relifeinsurance

दुई नदीले बनाएका खोंच पार गर्न घन्टौं समय लाग्थ्यो। बजारबाट तल नदीको किनारमा ओर्लियो। भए पुल, नभएर आफै नदी तरेर फेरि उकालो लाग्नुपथ्र्यो। 

यहि समस्यालाई सम्बोधन गर्यो कुश्मा र ज्ञादी जोड्ने झोलुंगे पुलले। यो पुल आफैमा लामो त छँदैथियो। नदी सतहबाट बनेको नेपालकै अग्लो पुलका रुपमा पनि यसले परिचय बनायो। 

स्थानीयलाई आउजाउ गर्न सहज भएको यो पुल स्वदेशी र विदेशी पर्यटकका लागि समेत आकर्षणको थलो बन्यो। 

त्यसपछि कालीगण्डकी नदीमाथि यस्तै पुल बन्यो पर्वत र बागलुङ जोड्ने गरी। यसले पहिलो पुलको उचाइको रेकर्ड तोड्यो। 

अहिले फेरि पर्वतमा अर्को पहिचान थपिएको छ बन्जी रस्विङ। द क्लिफ प्रालिले कालीगण्डकीको खोंचमा पर्वतको सदरमुकाम कुश्मा र बाग्लुङको बलेवा जोड्ने आधा किलोमिटर लामो पुल बनाएर बन्जी, स्विङ सञ्चालन थालेको छ । 

स्काइ साइक्लिङ पनि गराउने लक्ष्य राखेको कम्पनीले यही कात्तिक १५ गतेबाट औपचारिक रुपमा साहसिक खेल सञ्चालन गर्ने भएको हो।  

२०७३ सालदेखि पुलको निर्माण सुरु गरिएको थियो। यसअघि पुलसँंगै रिसोर्टको निर्माण ०७६ अन्तिममा सकिएको थियो। लकडाउनले सञ्चालनमा आउन नसकेको कम्पनीका अध्यक्ष राजु कार्कीले बताए।

विश्वकै अग्लो स्विङ र दोस्रो अग्लो बन्जी

५२५ मिटर लामो झोलुंगे पुलको बीचमा कालीगण्डकी नदीको ठीक माथि बन्जी र स्विङ (पिङ) का लागि जम्प गर्ने प्लाटफर्मको निर्माण गरिएको छ। खोलादेखि पुलको उचाइ २२८ मिटर अर्थात ७४८ फिट  छ । 

हाल विश्वकै अग्लो बन्जी मकाउमा ७६४ फिट उचाइ र दोश्रो अग्लो स्वीट्जरल्यान्डको भरजस्का बाँधमाथि ७२० फिट उचाईमा छ। 

द क्लिफ प्रालिको यो परियोजना पछि स्वीटरल्यान्डलाई पछि पार्दै यसले विश्वकै दोस्रो अग्लो बन्जिका रुपमा दर्ज गर्ने दाबी अध्यक्ष कार्कीको छ । 

बन्जी र स्विङ दुवैका लागि हाल ७ हजार रुपैयाँ तोकिएको छ। टेन्डम (जोडी) बन्जीको १२ हजार लाग्ने छ। 

गुलेली शैलीको पिङ

बन्जीकालागि निर्माण भएको पुलको उचाइ २२८ मिटर  छ भने सोभन्दा माथि बाइएको पिङको उचाइ नदीबाट २४८ मिटर  छ ।

जमीनबाट १२ मिटर अग्लो बनाइएको पिङ नेपालमा अहिलेसम्म बनाइएका पिङभन्दा फरक रहेको कम्पनीको दाबी छ। 

यो गुलेलीको शैलीमा निर्माण गरिएको छ। सामान्यतया पिङमा अरुले हल्लाइदिनु पर्ने हुन्छ तर यसमा खेल्ने मान्छे पिङमा बसेपछि पछाडि बाट मेसिनले तानेर हुत्त छोडिन्छ अनि पिङ मचिन्छ।

चट्टान आरोहण लगायत साहसिक खेलमा प्रयोग हुने उच्च गुणस्तरको डोरीको प्रयोग गरिएको र दक्ष प्राविधिकबाट डिजाइन गरी निर्माण गरिएको पिङ नेपालकै नमुना पिङ बनेको कार्कीको दाबी छ। पिङ खेल्न प्रतिव्यक्ति २५० रुपैयाँ लाग्ने कार्कीले बताए।

स्काइ साइक्लिङ

स्टिल कोर केबल प्रयोग गरी स्काइ साइक्लिङ तयार गरिएको छ। विश्वकै सबैभन्दा उँचाइमा सन्चालित कालीगण्डकी खोंचको स्काइ साइक्लिङ २२८ मिटर अग्लो छ भने लम्बाइ ३ सय मिटर छ। दुइतर्फी ३ सय मिटर लम्बाइ रहेको रुटमा १ पटकमा २ जनाले साइक्लिङ गर्न मिल्ने कार्कीले बताए।  

रिसोर्ट
बाग्लुङको बलेवामा २५ रोपनी क्षेत्रफलमा ‘द क्लिफ रिसोर्ट’ बनेको छ। २१ वटा सफारी टेन्ट रहेको रिसोर्टमा ७० जना अट्ने छ्न्।

लागत 
सम्पूर्ण परियोजना सक्न २० करोड खर्च हुने योजना भए पनि लकडाउनले गर्दा समयमा उदघाटन गर्न नपाएर लागत बढेर २८ करोड पुगेको कम्पनीका अध्यक्ष राजु कार्की बताउँछन्। 

अध्यक्ष  कार्की सँगै युवराज जोशी, नेत्रप्रसाद पराजुली, फ्लोरेन्स कार्की, राजन जोशी र नवराज शर्मा लगायतको लगानी परियोजनामा छ।
बन्जी र स्विङकालागि बनाइएको पुलको मात्र लगानी ८ करोड छ। १२० रुपैयाँ तिरेर उक्त पुल वारपार गर्न सकिन्छ। 

कसरी पुग्ने?

द क्लिफ प्रालि पोखरा बाट ५५ किमि, अन्नपूर्ण बेसक्याम्पको गेटवे नयाँपुलबाट १५ किमी दुरिमा अवस्थित छ। 

काठमाडौं, चितवन, पोखराबाट पर्वत कुश्मासम्म सजिलै सार्वजनिक बस पाइन्छ। पोखराको बाग्लुङ बसपार्कमा गएर कुश्मासम्म पुग्ने ‘सेयरिङ ट्याक्सी’मा पनि जान सकिन्छ। 

द क्लिफमै गाडी सहितको प्याकेज बुक गरेर  पोखरा–कुश्मा दुइतर्फी गाडीको सुविधा लिन सकिन्छ। 
जम्प नगर्ने तर हेर्न मात्र जान चाहने व्यक्तिले २ हजार रुपैयाँ तिरेर ‘गो एन्ड सी’ प्याकेज रोजेर २ तर्फी गाडीको सुविधा लिन सक्छन्।


 

प्रतिक्रिया दिनुहोस्