मोरङमा भदौ २८ सम्म निषेध आदेश

विराटनगर– मोरङमा खुकुलो प्रावधानसहित भदौ २८ गतेसम्म निषेध आदेश थपिएको छ।

जिल्ला प्रशासन कार्यालय मोरङले सार्वजनिक सवारीसाधन सञ्चालन गर्न नपाउने गरी सोमबार भदौ २८ गतेसम्म निषेध आदेश थप गरेको जनाएको हो।

निषेध आदेश अवधिमा सार्वजनिक यातायात, होटल, सैलुन, हाटबजार र सभासमारोहबाहेक सबै खुला हुनेछ। यसअघि दैनिक चार बजेसम्म खुला गरिएको बजार अब ७ बजेसम्म खुल्ने भएको छ।

होटल र रेस्टुरेन्ट पनि ग्राहक नराखी टेकअवे वा होम डेलिभरी गर्ने गरी सञ्चालन गर्न पाउने भएका छन्। सो अवधिमा राति ९ बजेदेखि बिहान ५ बजेसम्म हिँडडुलमा भने प्रतिबन्ध लगाएको प्रशासनले जनाएको छ।

कोरोना महामारी अझै नियन्त्रणमा नआएको र निषेध आदेशले दैनिक जनजीवन पनि कष्टकर भइरहेकाले जीवनयापन सहज बनाउने गरी निषेध आदेश जारी गरेको प्रमुख जिल्ला अधिकारी कोषहरि निरौलाले जानकारी दिए।