काठमाडौं– नेपाली कांग्रेसका सांसद डा. नारायण खड्काले परराष्ट्रमन्त्री पदको शपथ लिएका छन्। हिजो मंगलबार बसेको सत्तारूढ गठबन्धन बैठकमा खड्कालाई परराष्ट्रमन्त्री बनाउने सहमति भएको थियो। सोहीअनुसार उनले आज मन्त्री नियुक्त भएर शपथ लिएका हुन्।
शपथ लिएसँगै उनी आजै संयुक्त राष्ट्रसंघको महासभामा भाग लिन अमेरिका जाँदैछन्। मन्त्री खड्काले अमेरिका भ्रमणमा मिलेनियम च्यालेन्ज कर्पोरेसन (एमसीसी) को विषय प्राथमिकतामा नरहने बताए।
मन्त्री खड्का महासभामा भाग लिनेछन् भने सार्क मुलुकका परराष्ट्रमन्त्रीहरुसँग साइडलाइन भेटवार्ता गर्ने कार्यक्रम छ। उनले आफ्नो भ्रमणको एजेन्डामा एमसीसी नरहेको बताए। उनले भने, ‘म राष्ट्रसंघ महासभामा भाग लिन जान लागेको हुँ, एमसीसी प्राथमिकताको सूचीमा छैन।’ नेपालमा एमसीसी सम्झौताबारे विवाद छ।