वीरलाई पनि कोरोना अस्पताल बनाउने मन्त्रालयको निर्णय

काठमाडौं- वीर अस्पतालमा अबदेखि कोरोना संक्रमितको मात्रै उपचार हुने भएको छ।

स्वास्थ्य तथा जनसंख्या मन्त्रालयका अनुसार ‘इन्सिडेन्ट कमाण्ड सिस्टम’ को बैठकले वीर अस्पताललाई कोभिड अस्पतालको रुपमा सञ्चालन गर्ने निर्णय गरेको छ।

साथै वीरमा सञ्चालन भइरहेका स्वास्थ्य सेवालाई राष्ट्रिय ट्रमा सेन्टरबाट सञ्चालन गर्ने निर्णय भएको मन्त्रालयका प्रवक्ता प्रा. डा. जागेशवर गौतमले जानकारी दिए।

कोरोना संक्रमित र अन्य बिरामीलाई एकै ठाउँमा राखेर उपचार गर्दा ठूलो संख्यामा स्वास्थ्यकर्मीहरु संक्रमित भएपछि वीर अस्पताललाई कोरोनाका संक्रमित मात्रै उपचार गर्ने अस्पताल बनाइएको हो।

वीर अस्पतालमा कोरोना संक्रमित र अन्य बिरामीलाई एकै ठाउँमा राखेर उपचार गर्दा त्यहाँका अन्य बिरामी र अस्पतालका ७० जना भन्दा बढी स्वास्थ्यकर्मीमा कोरोना पुष्टि भएको छ। अब अस्पतालका ३ वटै ब्लकमा कोभिडका बिरामीको उपचार गरिनेछ।