शुक्रबार, मंसिर १९, २०७७

समाचार

कृषि क्षेत्रको सुधार नभएसम्म उद्योगले खुट्टा टेक्दैन : कृषिमन्त्री भुसाल

1603545920.jpg

भैरहवा-  कृषिमन्त्री घनश्याम भुसालले सरकार कृषि क्षेत्रलाई सुधार्दै गर्दै अघि बढिरहेको बताएका छन्।

relifeinsurance

उनले भने, 'किसानका समस्या समाधान नगरेसम्म उद्योगले खुट्टा टेक्दैन। कृषिको श्रमलाई उद्योगतिर लैजानुपर्छ।'

उद्योग व्यापार संगठन रुपन्देहीको भवन शिलान्यास गर्दै मन्त्री भुसालले ३० वर्षयता कृषिमा खासै काम हुन नसकेको बताए।

उनले भने, 'पञ्चायतकालमा विकसित देशहरुले कृषिमा सहयोग गर्थे तर अहिले हुन सकेको छैन।'  पञ्चायतको अन्तिम तिरबाट दाताहरुमा आश्रित विकास अवरुद्ध हुँदै गएको उनको भनाइ छ।

उनले भने, '२०४६ पछि सबै काम बजारले गर्छ कृषि क्षेत्रलाई छाडियो, जसका कारण कृषि क्षेत्र विकसित हुन सकेन।' 

मन्त्री भुसालले कृषि मन्त्रालय कडा रुपमा प्रस्तुत भइरहेको दाबी गरे।

उनले समयमै मल आयात नगर्ने ठेकेदारको १० करोड रुपैयाँ जफत गरिएको बताए। उनले कोल्ड स्टोर बनाउने भनेर राज्यलाई ठग्ने १० वटा फार्ममाथि कारबाही गरिएको जानकारी दिए। 

नेकपा स्थायी कमिटी सदस्यसमेत रहेका भुसालले सरकारले कृषि क्षेत्रको सुधारका लागि पाँच वटा नीतिगत आधार तय गरेर काम गरिरहेको बताए। 

उनले अनुदान रकम स्थानीय तहलाई नै दिन थालिएको, हरेक वडामा प्राविधिक खटाउने गरी योजना अगाडि बढाएको र  किसानका लागि वित्तीय पहुँच अझै राम्रो बनाउन लागिपरको लबताए।

सीमान्तकृत किसानलाई निब्र्याजी रिन दिन थालिएको र  किसानको उत्पादनले मूल्य पाउने गरी योजना बनाएको बताए। 

उनले अबको तीन वर्षमा कृषिको सिंगो व्यवस्था स्थानीय तहमा  हस्तान्तरण गर्ने गरी काम भइरहेको जानकारी दिए।

उनले भने, 'मलखाद र बिउ पनि पालिकाहरुमा लैजाँदै छौं।' 

कार्यक्रममा पूर्वभमिसुधार राज्यमन्त्री हकिकुल्लाह खानले सरकारको प्राथमिकता कृषि हुनुपर्ने बताए। सिद्धार्थनगर प्रमुख हरिप्रसाद अधिकारीले स्थानीय सरकार जनपक्षीय रुपमा अगाडि बढिरहेको बताए। 

उद्योग व्यापार संगठनका अध्यक्ष नारायणप्रसाद भण्डारीले १४ वर्ष अगाडि स्थापित निजी संस्था सामूहिक उत्पादनमा लाग्ने गरी अगाडि बढेको बताए। 

उद्योग व्यापार संगठनका पूर्वअध्यक्ष खिमबहादुर खत्री, व्यापार संघका अध्यक्ष यमलाल लोहनी, सिद्धार्थ उद्योग वाणिज्य संघका अध्यक्ष कुलप्रसाद न्यौपाने, चोपलाल आचार्य, हितराज पन्थी, देवेन्द्र पाण्डे, अनुप बराल, टीकाराम भट्टराई लगायतले कोरोना महामारीका बीचमा समृद्धिका लागि सबैको एकता जरुरी रहेको बताए।

उद्योग व्यापार संगठनले सिनपा-९ मा अढाई कठ्ठामा  सुविधा सम्पन्न भवन निर्माण गर्न लागेको हो। 

प्रतिक्रिया दिनुहोस्