विराटनगर- पछिल्लो २४ घण्टामा कोरोना भाइरस (कोभिड-१९) संक्रमणबाट मोरङमा थप ४ जनाको मृत्यु भएको छ।
विराटनगरका २ महिला तथा बुढीगंगा र धनपालथानका १-१ पुरुषको मृत्यु भएको सामाजिक विकास मन्त्रालयले जनाएको छ।
आज थपिएका ४ जनासहित मोरङमा कोरोनाबाट मृत्यु हुनेको संख्या २१ जना पुगेको छ। मृत्यु हुनेमा विराटनगरका १३ जना र बुढीगंगाका ३ जना छन्। यस्तै रंगेली, धनपालथान, सुनवर्षी, बेलबारी र पथरीशनिश्चरेका १–१ जनाको कोरोनाबाट मृत्यु भएको छ।
प्रदेश १ भरि शनिबारसम्म मृत्यु हुनेको संख्या ३९ पुगेको छ। प्रदेश १ ठेगाना भएका २७ रहेका छन्। अन्य १२ जना प्रदेश १ बाहिरका छन्।
प्रदेश १ मा शनिबार १ हजार ७६१ जनाको पीसीआर परीक्षण गरिएको छ। परीक्षण गरिएकामध्ये २३ महिला र ३१ पुरुषको रिपोर्ट पोजेटिभ आएको छ।
जसमध्ये मोरङका ३४, सुनसरीका १३, झापाका ५, इलामका १ र प्रदेश १ बाहिरका १ जना रहेको सामाजिक विकास मन्त्रालयले जनाएको छ।
यो सहित प्रदेश १ मा कोरोना संक्रमितको संख्या ३ हजार ८७९ पुगेको छ।
प्रदेश १ मा शनिबार १६ जना डिस्चार्ज भएका छन्। उनीहरु सबै कोशी अस्पताल कोभिड–१९ उपचार केन्द्रबाट डिस्चार्ज भएका हुन्।
प्रदेश १ मा डिस्चार्ज हुनेको संख्या १ हजार ८३५ पुगेको सामाजिक विकास मन्त्रालयले जनाएको छ। मन्त्रालयका अनुसार हालसम्म ९७ हजार २२१ जनाको कोरोना परीक्षण गरिएको छ।