संक्रमणमुक्त डाक्टर भन्छन्- मनोबल उच्च बनाउनुपर्छ, सबैले सकारात्मक उर्जा दिनुपर्छ

काठमाडौं– भरतपुर अस्पताल चितवनका प्रमुख मेडिकल सुपरिटेन्डेन्ट डा. श्रीराम तिवारी कोरोना संक्रमणमुक्त भएका छन्।

२० दिन लामो आइसोलेसन बसाइपछि तिवारी आज (शुक्रबार) संक्रमणमुक्त भएका हुन्। अस्पतालका चिकित्सक र कर्मचारीहरुले फूलमाला लगाएर तिवारीलाई स्वागत गरेका छन्।

‘म एकदमै खुशी छु, आजको स्वाब परीक्षण रिपोर्ट नेगेटिभ आएपछि संक्रमणमुक्त भएको छुँ,’ तिवारीले भने, ‘मनोवल उच्च राख्नुपर्छ। सबैले सकारात्मक सोच्यो भने उर्जा हुन्छ।’

स्वास्थ्यकर्मीहरुले घरपरिवार नभनेर दिनरात फ्रन्टलाइनमा काम गरिरहेकाले अवहेलना गर्ने, दुर्व्यवहार गर्ने र हत्तोत्साहित पार्ने काम कसैले गर्न नहुने उनले बताए। डा. तिवारीले उच्च मनोबलका साथ स्वास्थ्यकर्मीहरुले पनि काम गर्नुपर्ने बताए।

‘सरकारी अस्पतालले मात्रै धान्न सक्दैन निजी अस्पताललगायत सबै मिलेर यसविरुद्ध लड्नुपर्छ,’ उनले भने।

फ्रन्टलाइनमा काम गर्दा जोखिम पनि रहेको र सुरक्षा अपनाउँदा पनि संक्रमणको जोखिम कायमै रहेको बताए।

उनका अनुसार अहिले भरतपुर अस्पतालका ३२ जना स्वास्थ्यकर्मीहरु संक्रमित छन्। डा. तिवारीले आफ्नो स्वास्थ्यलाभको कामना गर्ने सबैलाई धन्यवादसमेत दिए।