काठमाडौं– वर्षाका कारण खेल प्रभावित बनेपछि नेपाली लेग स्पिनर सन्दीप लामिछानेको टिम जमैका तलावाज र सेन्ट किट्स एण्ड नेविस पेट्रियोट्सले सीपीएलमा अंक बाँडेका छन्। ट्रिनिडाड एण्ड टोबागोमा वर्षाका कारण खेल प्रभावित बनेपछि दुवै टिमले अंक बाँडेका हुन्।
अंक बाँडे पनि तलावाज शीर्ष चारमा कायमै छ। अब उसलाई सेमीफाइनल पुग्नका लागि बाँकी दुई खेल जित्नैपर्ने दबाब परेको छ।
टस हारेर ब्याटिङको निम्तो पाएको तलावाजले ५.४ ओभर खेलेर ४६ रन बनाएपछि मैदानमा वर्षा सुरु भएको थियो। लामो समयसम्म पनि वर्षा नरोकिएपछि दुवै टिमले अंक बराबरी गरे।
बिहीबार रातिको खेलमा अंक बराबरी गरेसँगै जमैका तलावाजको ७ अंक भएको छ भने सेन्ट किट्सले ३ अंक जोडेको छ। जमैका ७ अंकका साथ चौथो स्थानमा कायम छ।
अहिलेसम्मको नतिजा अनुसार एक खेल मात्र बाँकी रहेको ट्रिनिडाडले ४ अंक बनाउँदै पाँचौ स्थानमा छ भने सेन्ट किट्स पुछारमा छ।
गएरातिको खेलसँगै १६ अंकका ट्रिनबागो नाइट राइडर्स अंकतालिकाको शीर्षस्थानमा छ, १२ अंकका साथ दोस्रो स्थानमा गुएना अमेजन वारियर्स छ भने १० अंक बनाएको सेन्ट लुसिया जोउक्स तेस्रो स्थानमा छ।