वीरगन्ज- कोरोना भाइरसको संक्रमणबाट पर्सा, बारा र रौतहट जिल्लाका थप ११० जना संक्रमित भएका छन् ।
वीरगन्जको नारायणी अस्पतालमा गरिएको परीक्षणमा पर्साका ६९ जना, बाराका २४ र रौतहटका १७ जनामा संक्रमण पुष्टि भएको अस्पतालका प्रवक्ता डा अतुलेश चौरसियाले जानकारी दिए।
५७६ जनाको स्वाब परीक्षण गरिएकोमा ८० जना पुरुष र ३० महिलाहरुको रिपोर्ट पोजेटिभ आएको हो ।
संक्रमण देखिनेमा डेढ वर्षका नाबालकदेखि ८० वर्षका वृद्ध समेत रहेका छन् ।
पर्साको वीरगन्ज महानगरपालिकाका विभिन्न वडाका ४९ जना, कालिकामाइ गाउँपालिका–२ का चारजना, बहुदरमाइ नगरपालिकाका ५ जना, पर्सागढि नगरपालिकाका ७ जना र पोखरिया नगरपालिकाका ४ जनामा कोरोना संक्रमण पुष्टि भएको हो ।
यस्तै बाराको कलैया उपमहानगरपालिकाको विभिन्न वडाका २४ जना र रौतहटको यमुनामाइ गाउँपालिकाको वडा नम्बर ३ का १७ जनामा कोरोना पोजेटिभ देखिएको नारायणी अस्पतालका प्रवक्ता डा चौरसियाले जानकारी दिए।