धनगढी- भरुवा बन्दुकसहित जंंगलमा काठ चिर्दै गरेको अवस्थामा दुई जना पक्राउ परेका छन् ।
सबडिभिजन वन कार्यालय वर्दगोरिया र देउराली सामुदायिक वनबाट गएको संयुक्त टोलीले आज बिहान जंगलमा काठ चिरान गरिरहेको अवस्थामा दुई जनालाई पक्राउ गरेको हो। तीन जना भने फरार भएका छन् ।
मोहन्याल गाउँपालिका–६ र लम्कीचुहा नगरपालिका–६ मा रहेको देउराली सामुदायिक वनको सिमानामा रहेको खहरे खोलामा पर्ने राष्ट्रिय वनको क्षेत्रभित्र सालको काठ चिरान गर्दै गरेको अवस्थामा मोहन्याल गाउँपालिका–६, बादेगौजाका ४३ वर्षीय नैन बहादुर सिँजाली मगर र ३६ वर्षीय तुल बहादुर घर्तिमगरलाई प्रहरी टोलीले पक्राउ गरेको हो ।
सबडिभिजन वन कार्यालय वर्दगोरियाका प्रमुख सहायक वन अधिकृत कृष्णबहादुर बोहोराले भरुवा बन्दुक सहित दुई जनालाई पक्राउ गर्न सफल भए पनि तीन जना भागेको बताए।
घटनास्थलबाट तयारी अवस्थामा राखिएको २ थान भरुवा बन्दुक, १४ फुटका ९ थान सालको कडी, काठ चिर्ने ३ वटा आरा, २ बञ्चरा बरामत गरिएको सहायक वन अधिकृत बोहोराले बताए ।
यता, पक्राउ परेका नैन बहादुर सिँजाली मगरले लम्कीचुहा नगरपालिका–६ मा बस्ने गोविन्द चन्दले घरमा आएर ८० रुपैयाँ क्यूफिट ज्यालादारी दिनेगरी काममा लगाएको बताएका छन् । चन्दले पेश्की स्वरुप प्रतिव्यक्ति २ हजारका दरले ४ जनालाई सुरुमै ८ हजार दिएको मगरले बताए।
पक्राउ परेका तुलबहादुर घर्तिमगरले जंगलमै खान बस्नको व्यवस्था गरेर आफूहरुलाई काम गर्न लागेको बताए । उनले भदौ १४ गतेदेखि जङ्गलमा काठ चिरान गर्न लागेको बताए ।
काठ चिरान गर्न लगाउने गोविन्द चन्द देउराली सामुदायिक वनका निवर्तमान अध्यक्ष हुन्। देउराली सामुदायिक वनका अध्यक्ष ललित कामीले घटनास्थलमा पुग्दा काठ चिरान गर्ने र खाना बनाउने तयारी भइरहेको बताए ।
पक्राउ परेकाहरुले गोविन्द चन्द र उनका भाइ मिलन चन्द्रले काठ चिराउन लगाएको बताएको अध्यक्ष कामीको भनाइ छ ।