७० करोड घुस काण्डमा जोडिएका विजय मिश्रलाई अख्तियारको ७ दिने म्याद

काठमाडौं- सेक्युरिटी प्रिन्टिङ प्रेस खरिद प्रक्रियाका एजेन्ट विजयप्रकाश मिश्रका नाममा अख्तियार दुरुपयोग अनुसन्धान आयोगले ७ दिने म्याद जारी गरेको छ।

प्रेस खरिदमा ७० करोड कमिसन मोलमोलाई गरेको सम्बन्धि उजुरी बारे बुझ्न आवश्यक परेको भन्दै अख्तियारले हाजिर हुन मिश्रका नाममा बुधबार सूचना प्रकाशित गरेको हो।

७ दिन भित्र आयोगमा उपस्थित नभए कानुन बमोजिम कारबाही हुने अख्तियारद्वारा जारी सूचनामा उल्लेख छ।

प्रेस खरीद गरेपछि प्राप्त हुने कमिसनको मोलमोलाइ गरेको अडियो सार्वजनिक भएपछि तत्कालीन सञ्चार तथा सूचना प्रविधिमन्त्री गोकुल बाँस्कोटाले २०७६ फागुन ८ गते पदबाट राजीनामा दिएका थिए।

त्यही प्रकरणमा अख्तियारले बाँस्कोटामाथि छानबिन थालेको थियो। अनुसन्धान थालेको करिब ६ महिनापछि अख्तियारले स्वीस कम्पनिका स्थानीय एजेन्ट मिश्रका नाममा सुचना जारी गरेको हो।

अख्तियारले ७० करोड रुपैयाँ घूस मोलमोलाइ गरेको आरोप खेपिरहेका बाँस्कोटालाई उन्मुक्ति दिने तयारी गरेको अख्तियार स्रोतले जनाएको छ।

‘बाँस्कोटाले घूस लिए र खाएको प्रमाणित नहुने’ भनी अनुसन्धान अधिकृतले तयार पारेको प्रतिवेदन अख्तियारको बैठकमा पेस हुने र त्यहींबाट उजुरी तामेलीमा पठाउने तयारी भएको हो। आरोप पुष्टि नहुने उजुरी अख्तियारको निर्णयबाट तामेलीमा जान्छ।

मिश्र हाल जापानमा रहेकाले बयान दिनुपर्ने मान्छे विदेशमा रहेको बहानामा उक्त फाइल गुपचुप तामेलीमा पठाउने तयारी अख्तियारले गरेको छ।