काठमाडौं- विश्वव्यापी महामारीको रुपमा फैलिएको कोरोना भाइरसबाट पछिल्लो २४ घण्टामा २ लाख ५७ हजार ७ सयभन्दा धेरै संक्रमित भएका छन् । ५ हजार ८ सय ४६ जनाको मृत्यु भएको छ ।
पछिल्लो २४ घण्टामा सबैभन्दा धेरै संक्रमित भारतमा थपिएका छन् भने सबैभन्दा धेरै मृत्यु ब्राजिलमा भएको छ । भारतमा ७८ हजार १ सय ६९ जना संक्रमित थपिएका छन् भने १ हजार २५ को मृत्यु भएको छ ।
ब्राजिलमा थप ४१ हजार ८ सय ८९ जनामा संक्रमण पुष्टि भएको छ भने १ हजार १ सय ६६ जनाको मृत्यु भएको छ । अमेरिकामा ४१ हजार ५ सय ७९ जना संक्रमित थपिदा १ हजार १ सय ३८ जनाको मृत्यु भएको छ ।
यस्तै पछिल्लो २४ घण्टामा अर्जेन्टिनामा १० हजार ५ सय ४, कोलम्बियामा ८ हजार ९ सय, पेरुमा ५ हजार ९२, रुसमा ४ हजार ७ सय २९, फिलिपिन्समा ३ हजार ४ सय ८३, इराकमा ३ हजार ४ सय ४ जना संक्रमित थपिएका छन् ।
यस्तै मंगलबार एकै दिनमा स्पेनमा ८ हजार १ सय १५, फ्रान्समा ४ हजार ९ सय ८२, बेलायतमा १ हजार २ सय ९५, जर्मनी १ हजार २ सय ९ जना संक्रमण पुष्टि भएको छ ।
पछिल्लो समय स्पेन, फ्रान्स, बेलायत, जर्मनी, इटाली लगायतका युरोपेली मुलुकमा दिनहुँ हजारौंको संख्यामा नयाँ संक्रमित थपिन थालेका छन् ।
दिनहुँ सयौं ब्यक्तिको कोरोनाकै कारण मृत्यु भइराखेको विश्व स्वास्थ्य संगठन (डब्लुएचओ) ले जनाएको छ । डब्लुएचओका अनुसार युरोपमा कोरोनाको दोस्रो लहर सुरु भएको छ ।
जोन हपकिन्स विश्वविद्यालयका अनुसार कोरोनाबाट विश्वभर २ करोड ५६ लाख ५० हजारभन्दा धेरै संक्रमित भएका छन् भने ८ लाख ५४ हजार ५ सय ९६ जनाको मृत्यु भएको छ। दिनहुँ ५ देखि ६ हजार संक्रमितको मृत्यु हुने गरेको छ ।