बिहिबार, कात्तिक १३, २०७७

Happy Dashain
समाचार
1602935814.jpg

विराटनगर– शनिबारदेखि दसै सुरु भएको छ। यसवर्षको दसैं विगतका वर्षहरुको जस्तो छैन। दसैंमा कुनै उल्लास छैन।

दसैं आएको अनुभूति हुनेखालका कुनै गतिविधि छैनन्। विश्वव्यापी रुपमा फैलिएको कोरोना महामारीका कारण प्रशासनले सामूहिक भेला हुने सम्पूर्ण गतिविधिमा रोक लगाएको छ। विशेषगरी घटस्थापनादेखि विशेष चहलपहल हुने शक्तिपीठहरु सुनसान छन्।

पुजारीलाई नित्यकर्म गर्न बाहेक मन्दिरमा अन्य व्यक्तिको प्रवेश पूर्णतया बन्द गरिएको छ। मोरङ प्रशासनले नियमित पूजा पाठ बाहेक मानिसहरु जम्मा हुनेगरी उत्सव, भजन किर्तन, बलि लगायतका कार्य नगर्न भनेको छ। दसैं लगायतको चाडपर्वमा संक्रमण थप बढ्न सक्ने भएकाले मानिसहरु जम्मा हुने  उत्सव लगायतका कार्यक्रम नगर्न भनिएको सहायक प्रमुख जिल्ला अधिकारी ध्रुवबहादुर खड्काले बताए। 

हरेक वर्ष घटस्थापनादेखि विराटनगरको काली मन्दिरमा दसैं महोत्सव लाग्ने गर्थ्यो। कोरोनाका कारण दसैं महोत्सव नगर्ने व्यवस्थापन समितिले निर्णय गरेको छ। मन्दिरमा पुजारीले पूजापाठ गर्ने बाहेक अन्यको उपस्थिति नहुने काली मन्दिर व्यवस्थापन समितिका सदस्य गोपालप्रसाद गुप्ताले बताए।

उनका अनुसार मन्दिर परिसरमा पशुपंक्षीको बलिको कार्यक्रमहरुमा समेत रोक लगाइएको छ। यसपटक मन्दिर पुग्ने भक्तजनले भौतिक दुरी कायम गर्दै भुइँ तलाबाटै देवीको स्मरण गर्दै पूजापाठ गरी फर्किनुपर्ने सदस्य गुप्ताले बताए।

मन्दिरले आन्तरिक रुपमा दसैंको धार्मिक विधि विधान अनुसारका सबै कार्यक्रमहरु आयोजना गर्ने मुख्य पुजारी विष्णुहरि दाहालले बताए। 

मोरङ रंगेलीमा रहेको संसारीमाई मन्दिरमा प्रदेश सरकारले प्रदेश स्तरीय फूलपाति बढाइँको कार्यक्रम गत वर्षदेखि शुरु गरेको छ। घटस्थापनादेखि दैनिक हजारौंको सहभागिता रहने संसारी माईस्थान मन्दिरमा यो वर्ष भिडभाड हुने छैन।

मन्दिर दर्शनका लागि स्वास्थ्य सावधानी अपनाएर आउनेलाई मात्र प्रवेश दिइने व्यवस्थापन समिति अध्यक्ष सञ्जीवकुमार श्रेष्ठले बताए। उनले भने, ‘दर्शन गर्न आउनेले सामाजिक दुरी कायम गर्नुपर्ने छ।’ पालो गरी दर्शन गर्ने व्यवस्था मिलाइएको श्रेष्ठले बताए।

उनका अनुसार विगतका वर्षको तुलनामा दर्शन गर्न आउनेको संख्या अहिले नगन्य छ। फूलपाति बढाइँका लागि प्रदेश सरकारसँग छलफल भइरहेको उनले बताए।

हरेक बर्ष गरिँदै आएको १००८ कलश यात्रा, झाँकी र भजन सन्ध्या नहुने व्यवस्थापन समिति अध्यक्ष श्रेष्ठले बताए। मन्दिर र सेनाको टोली बाहेक सर्वसाधारण दिने पशुपंक्षी बलिमा प्रतिबन्ध लगाइएको उनले बताए।

सुनसरी धरानको दन्तकाली मन्दिर नेपालको प्रमुख शक्तिपीठ मध्येभित्र पर्छ। दसैंमा नित्य पूजा तथा विशेष पूजामा पुजारी बाहेक कसैलाई पनि प्रवेश गर्न नदिइने मन्दिर गुठी व्यवस्थापन समितिले जनाएको छ। मन्दिरका तर्फबाट मात्र बलि दिइने र फूलपातिको विधिमात्र गरिने मन्दिरका पुजारी विश्वराज खनालले बताए।

मन्दिरले सूचना निकालेर मन्दिर नआउन र घरमै पूजा गर्न आग्रह गरिएको उनले बताए। सुनसरी प्रशासनले समेत धार्मिक स्थलमा भिड हुने गतिविधि गर्न रोक लगाएको खनालले बताए। 

प्रतिक्रिया दिनुहोस्