काठमाडौं– स्वास्थ्य तथा जनसंख्या मन्त्रालयले कोरोना भाइरस परीक्षणको शुल्क ११ सय रुपैयाँले घटाएको छ।
स्वास्थ्य मन्त्रालयले आजैदेखि लागू हुने गरी नयाँ शुल्क ४ हजार ४०० रुपैयाँ तोकेको छ । मन्त्रालयका सहप्रवक्ता डा. समिरकुमार अधिकारीले अबदेखि सेवा शुल्कसहित बढीमा ४ हजार ४०० रुपैयाँभन्दा बढी लिन नपाउने नेपाल समयलाई जानकारी दिए ।
यसअघि कोरोना परीक्षण शुल्क ५ हजार ५०० रुपैयाँ थियो । परीक्षणका लागि चाहिने किटहरु पहिले विश्व बजारमै सस्तो भएसँगै नेपालमा पनि सस्तो मूल्यमा आएकाले मूल्य घटेको जानकारी उनले दिए ।
हाल मन्त्रालयले ९ वटा सरकारी र ११ वटा निजी प्रयोगशालामा गरी कुल २० वटा प्रयोगशालालाई शुल्क लिएर परीक्षण गर्ने अनुमति दिएको छ ।