रौतहटका कोरोना संक्रमितको वीरगन्जमा मृत्यु, थप ७९ जनामा कोरोना पुष्टि

वीरगन्ज- रौतहट गम्हरीया ३ का एक कोरोना संक्रमित पुरुष उपचारको क्रममा वीरगंजमा मृत्यु भएको छ ।

३० वर्षीय ती पुरुषलाई विहिबार नारायणी अस्पताल वीरगन्जमा भर्ना गरिएको थियो । अवस्था चिन्ताजनक भएकाले तत्काल जिन एक्सपोर्ट प्रविधिबाट लिएको रिपोर्टमा उनमा संक्रमण देखिएको थियो ।

संक्रमण पुष्टि भएको दुई दिनपछि उनको उपचारकै क्रममा शनिबार बेलुका मृत्यु भएको हो ।

पर्सामा ४७, बारामा ३० जना, मोरङ र काठमाडौँमा समेत एक एकजना संक्रमित थपिए

वीरगंजको नारायणी अस्पतालको पिसिआर ल्याबले गरेको परिक्षण अनुसार पर्सामा ४७, बारामा ३०, काठमाडौँ र मोरङमा एक÷एक जना संक्रमित थपिएका छन् ।

अस्पतालका चिकित्सक डा. अतुलेश चौरसियाका अनुसार पर्साको पोखरियामा १२ जना, वीरगंज महानगरपालिकामा ६ महिने बालक र ९७ वर्षीय वृद्धसहित ३६ जना संक्रमित थपिएका छन् ।

अस्पतालको पिसिआर परिक्षणमा बारा जिल्लाको विश्रामपुरमा ३ जना, महागढिमाई नगरपालिकामा २ जना, जितपुर सिमरा उपमहानगरपालिकामा २ जना र कलैया उपमहानगरपालिकाको विभिन्न वडा गरि ३० जना कोरोना संक्रमित थपिएका हुन् ।

यो बाहेक मोरङ र काठमाडौँका एक एक जना व्यक्तिमा समेत कोरोना संक्रमण पुष्टि भएकाे छ ।