ट्रिनिडाड एण्ड ट्रिबागो– क्यारेबियन प्रिमियर लिग(सीपीएल)मा नेपालका लेग स्पिनर सन्दीप लामिछाने रहेको टिम जमैका तलावाजले तेस्रो जित निकालेको छ।
पोर्ट अफ स्पेनमा गएराति सम्पन्न खेलमा तलावाजले सेन्ट किट्स एण्ड नेविर पेट्रियोट्सलाई ३७ रनले पराजित गरेको हो।
टस जितेर ब्याटिङ रोजेको तलावाजले सम्पूर्ण ओभर खेल्दै ६ विकेटको क्षतिमा १४७ रन बनाएको थियो। १४८ रनको लक्ष्य पाएको सेन्ट किट्स एक बल बाँकी रहँदा ११० रनमा समेटियो।
खेलमा तलावाजका ग्लेन फिलिप्सले ७९ रनको अर्धसतकिय पारी खेले भने जर्मिनाइ ब्ल्याकवुडले २७ रनको योगदान दिए। तल्लावाजका अन्य खेलाडीले प्रशंसनीय प्रदर्शन नगरे तापनि सेन्ट किट्सका रायद इम्रितले तीन विकेट लिए।
एक विकेट लिनेमा शिल्डन कोट्रेन, इमरान खान र इस सोधी रहे।
यता जवाफी ब्याटिङमा मैदान छिरेको सेन्ट किट्सका इविन लेविस र किइरन पोवेलले समान २१ रनको योगदान दिए अन्य खेलाडीले पनि सम्झनलायक प्रदर्शन गरेनन्।
यता तलावाजका सन्दीप लामिछानेले २ विकेट लिए। साथै विरासमी पेर्मउल र फिडेल एडवर्डले समान २–२ विकेट लिए। यता कार्लोस ब्रेथवेटले भने सर्वाधिक तीन विकेट लिए।
जितका साथ तलावाज तेस्रो स्थानमा उक्लिएको छ। उसले ६ खेलमा समान ३–३ हार र जित बोहोरेर ६ अंक बनाएको छ। ६ खेलका सबैमा जित निकालेको ट्रिनबागो नाइट राइडर्स १२ अंकका साथ शीर्ष स्थानमा छ भने ८ अंक बनाएको लुसिया जोउक्स दोस्रो स्थानमा छ।