छक्का हानेको बलले आफ्नै कारको सिसा फुटेपछि ...

काठमाडौं– आयरल्यान्डका अलराउन्डर केविन ओब्रायनले बिहीबार सम्पन्न एक प्रतियोगितामा विस्फोटक ब्याटिङ गर्दै सबैको मन जिते।

तर खेलको दौरान उनले एक यस्तो छक्का प्रहार गरे, जसले उनकै कारको सिसा तोडिदियो।

आइरिस अलराउन्डर ओब्रायन बिहीबार एउटा इन्टर प्रोभेन्सियल प्रतियोगिता खेलिरहेका थिए। उक्त खेलमा ओब्रायनले ३७ बलमै धमाकेदार ब्याटिङ गर्दै ८२ रनको पारी खेले।

इनिङभर ८ छक्का प्रहार गरेका उनले लामा छक्कासमेत प्रहार गरे। सोही समयमा उनको एक छक्का यति टाढा पुग्यो कि पार्किङमा राखिएको एउटा कारको पछाडिको सीसा चकनाचुर हुन पुग्यो।

इन्टरनेसनल क्रिकेट काउन्सिल (आईसीसी)ले ओब्रायनले छक्का प्रहार गर्दा उनकै कारको सिसा फुटेको बताएको छ।

‘केविन ओब्रायनले इन्टर प्रोभेन्सियल सिरिजको ए खेलमा ३७ बलमा ८२ रन ल्याए जहाँ उनले ८ छक्का प्रहार गरेका थए भने एक छक्काले उनको आफ्नै कारको सीसा तोड्यो,’ आईसीसीले ट्वीटरमा लेखेको छ।

प्रतियोगिता अवधिभर आफ्नै कारको सिसा टुटेको थाहा नपाएका ओब्रायन खेल सकिएपछि जब घर जान पार्किङमा पुगे, उनी अचम्मित परेको आइरिस मिडियाले बताएका छन्।

ओब्रायन आयरल्यान्डको टेस्ट क्रिकेटमा सतक प्रहार गर्ने पहिलो खेलाडीसमेत हुन्।