काठमाडौं– उपचारका क्रममा गत मंगलबार त्रिवि शिक्षण अस्पताल महाराजगन्जमा मृत्यु भएका उदयपुरका ५१ वर्षीय एक पुरुषमा कोरोना संक्रमण पुष्टि भएको छ।
पेशाले शिक्षक ती पुरुषको ४ मृत्यु भएको दिनपछि कोरोना रिपोर्ट पोजेटिभ आएको अस्पतालले जनाएको छ।
अस्पतालका कोभिड फोकल पर्सन डा. सन्तकुमार दासले मृतकको कोरोना रिपोर्ट पोजेटिभ आएपछि नेपाली सेनाले शव व्यवस्थापनका लागि लगेको जानकारी दिए। चार दिनसम्म कोरोना रिपोर्ट नआउँदा परिवारलाई मृत्यु संस्कारमा अप्ठ्यारो परेको थियो।
ज्वरो र श्वासप्रश्वासमा समस्या देखिएपछि भदौ ९ गते मंगलबार त्रिविमा भर्ना भएका त्रियुगा नगरपालिका–४ का पुरुष हस्पिटलमा भर्ना भएलगत्तै चिकित्सकले मृत्यु घोषणा गरेको थियो।
रिपोर्टमा ढिलाइ हुँदा उनले जिल्लामा उपचार गरेका ठाउँ, भेट्न आएका आफन्त र अध्यापन गर्ने विद्यालय परिवार अति जोखिममा रहेको एक जना आफन्तले बताए।