सुर्खेत– निजी विद्यालयमा छोराछोरी पठाउने दैलेखका ३० जना सरकारी शिक्षकलाई दश–दश हजार रुपैयाँ जरिवाना तिराउन थालिएको छ ।
सामुदायिक विद्यालयमा जागिर गर्ने र छोराछोरी निजी विद्यालयमा पठाउने शिक्षकलाई जरिवाना तिराउन लागिएको हो । गुराँस गाउँपालिकाले निजी स्कुलमा छोराछोरी पढाउने ३० जना शिक्षक र गाउँपालिक उपाध्यक्ष दीपा विसीलाई जनही दश हजार रुपैयाँ जरिवाना तिर्न पत्राचार गरेको छ ।
३० जना शिक्षकमध्ये वडा नं. ५ को कृष्ण माध्यमिक विद्यालयका मात्रै तीन जना शिक्षक छन् । उनीहरुलाई जरिवाना स्वरुप १० हजारका दरले आन्तरिक राजस्व कोषमा रकम दाखिला गर्न गाउँपालिकाले विद्यालयलाई पत्र पठाएको छ ।
सोही पत्रको आधारमा प्रधानाध्यापक सुरेन्द्रकुमार चन्दले भदौ ८ गते शिक्षकहरू पदमवहादुर नेपाली, रोशनी मल्ल र कमला कुमारी चन्दलाई जरिवाना रकम जम्मा गर्न पत्र पठाएका छन् ।
जरिवाना पत्र प्राप्त भएपछि शिक्षक पदम नेपालीले गाउँपालिकाको निर्णय नमान्ने बताएका छन् । उनले गाउँपालिकाविरुद्ध कानुनी उपचारको लागि अदालत जाने बताएका छन् । रिक्त दरबन्दीमा शिक्षक राख्नुको सट्टा गाउँपालिकामा छोराछोरी निजी विद्यालयमा पढाएको निहुँमा कारवाही गर्दा शैक्षिक अवस्थामा समस्या आउने उनको भनाइ छ ।
गाउँपालिकाले सामुदायिक विद्यालयको शैक्षिक अवस्था सुधारका लागि भन्दै २०७५ चैत २५ गते सरकारी शिक्षक र जनप्रतिनिधिले छोराछोरीलाई सामुदायिक विद्यालयमा पढाउनुपर्र्ने निर्णय गरेको थियो । शिक्षक र जनप्रतिनिधिले छोराछोरी निजी विद्यालयमा नपढाए १० हजार रकम जरिवाना गर्ने निर्णय गरिएको थियो ।
पहिलो वर्ष गाउँपालिकाका सबै शिक्षक र जनप्रतिनिधिलाई बालबालिका समुदायिक विद्यालयमा फर्काउन एक वर्षको समय दिएको थियो । गाउँपालिकाको निर्णय अटेर गर्ने शिक्षक र जनप्रतिनिधिलाई कारबाही गर्न लागिएको गाउँपालिकाका अध्यक्ष खेमराज वलीले जानकारी दिए ।