काठमाडौं– नेकपा माओवादी केन्द्रले वडादेखि केन्द्रसम्मकै नेतृत्व निर्वाचनबाट चयन गर्ने भएको छ। आगामी पुस ११ देखि १३ गतेसम्म राष्ट्रिय सम्मेलन गर्न लागेको पार्टीले वडा, गाउँ–नगर, जिल्ला, प्रदेश, संघीय निर्वाचन क्षेत्र र केन्द्रीय समितिसहित सबै कमिटीको नेतृत्व निर्वाचनबाट चुनिएर आउनुपर्ने गरी कार्यविधि बनाएको हो।
वडादेखि केन्द्रसम्म दुई लाख ८५ हजार पदमा अब निर्वाचनमार्फत नेतृत्व चयन हुनेछ। सम्मेलनअघि नै तल्ला कमिटीको सम्मेलन सकिने र नयाँ नेतृत्व चयन हुने पार्टीले जनाएको छ।
माओवादीको निर्वाचन कार्यविधिमा पार्टी अध्यक्ष र पदाधिकारीको चयन पनि निर्वाचनबाटै गर्ने उल्लेख छ। केन्द्रीय निर्वाचन समितिको भर्चुअल अभिमुखीकरण कार्यक्रममा अध्यक्ष पुष्पकमल दाहाल प्रचण्ड र नेता वर्षमान पुनले सबै तहको नेतृत्व निर्वाचन प्रक्रियाबाट चयन हुने बताउँदै त्यसैअनुसार तयारीमा जुट्न मातहतका कमिटीलाई निर्देशन दिएका छन्।
बैठकमा केन्द्रीय निर्वाचन आयोग अध्यक्ष विष्णुपुकार श्रेष्ठले निर्वाचन नियमावली, कार्यविधि र आचारसंहिताबारे प्रशिक्षण दिएका थिए। बैठकमा १८० केन्द्रीय सदस्य, ७ भौगोलिक र ३ गैरभौगोलिक गरी १० प्रदेशका प्रेदश निर्वाचन समितिका पाँच(पाँच जना सहभागी थिए।