काठमाडौं- सत्तारुढ दल नेपाल कम्युनिष्ट पार्टी(नेकपा)का दुई अध्यक्षबीच छलफल शुरू भएको छ।
प्रधानमन्त्रीका सञ्चारविज्ञ रामशरण बजगाईले प्रधानमन्त्री एवम् अध्यक्ष केपी शर्मा ओली र अर्का अध्यक्ष पुष्पकमल दाहालबीच बालुवाटारमा छलफल शुरू भएको जानकारी दिए।
कार्यदलले बुझाएको प्रतिवेदनका विषयमा छलफल गर्न ओली–दाहालबीच भेटवार्ता शुरू भएको हो। शनिबार कार्यदलले बुझाएको प्रतिवेदन अध्ययनपछि व्यवहारिक कार्यान्वयनका विषयमा अध्यक्षद्वयबीच भेटवार्ता भइरहेको छ।
पार्टीभित्र देखिएको विवाद समाधानका लागि ३० साउनमा दुवै अध्यक्षले कार्यदल गठन गरेका थिए। महासचिव विष्णु पौडेलको संयोजकत्वमा गठन गरिएको कार्यदलले विभिन्न सुझावसहितको प्रतिवेदन पेश गरिसकेकाे छ।
प्रतिवेदनमा ओलीले प्रतिनिधिसभाको कार्यकाल अवधिभर सरकार सञ्चालन गर्ने र दाहालले पार्टी सञ्चालनमा केन्द्रीत हुने उल्लेख गरिएको छ।
ओली र दाहालले छलफल गरेर प्रतिवेदन सचिवालय हुँदै स्थायी समितिबाट पारित गरेर कार्यान्वयनमा लगिने बताइएको छ।