सुर्खेत- रुकुम पश्चिमको कोष तथा लेखा नियन्त्रण कार्यालय (कोलेनिका)का नौ जना कर्मचारीलाई कोरोना भाइरस संक्रमण भएको छ। चौरजहारी नगरपालिकाको पीसीआर प्रयोगशालाले संक्रमण पुष्टि गरेको हो।
रुकुम पश्चिममा एउटै कार्यालयका नौ जनामा संक्रमण देखिएको यो पहिलो घटना हो।
कार्यालयका अधिकांश कर्मचारीमा कोरोना संक्रमण देखिएपछि ट्रेसिङमा समस्या भएको स्वास्थ्य कार्यालयका कोरोना फोकल पर्सन ईश्वर रावलले जानकारी दिए।
“कार्यालयमा आएका सेवाग्राहीको विवरण पत्ता लगाउन मुस्किल भएको छ,” रावलले भने, “अहिलेसम्म संख्या यकिन भएको छैन। तर, ठूलो संख्याको कन्ट्याक्ट ट्रेसिङ गर्नुपर्ने भयो।”
आज (आइतबार) संक्रमण पुष्टि भएकामध्ये नौ जना कोलेनिका र एक जना स्वास्थ्य कार्यालयका कर्मचारीहरु हुन्।
संक्रमितको संख्या बढेपछि मुसिकोट नगरपालिकालाई संक्रमित व्यवस्थापनमा समस्या भएको छ। “जिल्ला अस्पतालमा ६ बेडको आइसोलेसन छ, त्यसैलाई मिलाएर नौ बेडको बनाएका छौं,” कोरोना फोकल पर्सन रावलले भने, “एकै पटक धेरै जनालाई संक्रमण पुष्टि भएपछि आइसोलेसन व्यवस्थापनमा समस्या भयो।”
मुसिकोट नगरपालिकामा जिल्ला अस्पतालको बाहेक अन्य ठाउँमा आइसोलेसन छैन। एकै पटक १५ जना संक्रमित थपिएपछि उनीहरुलाई अस्पतालको तालिम हलमा राखिएको छ। संक्रमित सबै समुदायका हुन्। यसअघि मुसिकोट नगरपालिकामा विभिन्न समयमा गरी सात जनामा कोरोना पुष्टि भएको थियो।