काठमाडौं– स्वास्थ्य तथा जनसंख्या मन्त्रालयले काठमाडौं उपत्यकामा समुदायमा कोरोना संक्रमण फैलिए नियन्त्रण गर्न नसकिने बताएको छ।
मन्त्रालयका प्रवक्ता डा.जागेश्वर गौतमले आज आइतबारको नियमित प्रेस ब्रिफिङमा उपत्यकामा संक्रमण बढ्दै जाँदा चिन्ता थपिएको भन्दै समुदायमा संक्रमण फैलन नदिन सहयोग गर्न आग्रह गरे।
जनस्वास्थ्यको मापदण्ड नमान्दा संक्रमण फैलन सहयोग पुगेको उनको तर्क छ। काठमाडौं उपत्यकामा आज आइतबार १६६ जना कोरोना संक्रमित थपिएका छन्।
काठमाडौंका १२६ जना, ललितपुरका १२ जना र भक्तपुरका २८ जनामा संक्रमण पुष्टि भएको हो। योसँगै काठमाडौं उपत्यकामा कोरोना संक्रमितको कुल संख्या ३ हजार २४२ पुगेको छ।