काठमाडौं– कोरोना संक्रमण भएपछि उपचार गराइरहेका दुई थुनुवा वीरगन्जको कोरोना अस्थायी विशेष अस्पतालबाट फरार भएका छन्।
शनिबार राति अस्थायी कोरोना विशेष हेल्थ केयर अस्पतालमा उपचाररत दुई जना संक्रमित थुनुवा फरार भएको प्रहरीले जनाएको छ। अस्पतालका स्वास्थ्यकर्मी सुरक्षा गार्डको आँखा छल्दै उनीहरु फरार भएको पर्साका प्रहरी उपरीक्षक गंगा पन्तले जानकारी दिइन्।
सार्वजनिक शान्ति विरुद्धको कसुरमा मुद्दा चलिरहेका दुई जनामा कोरोना देखिएपछि भदौ १ गते अस्पताल भर्ना गरिएको पन्तले बताइन्।
“गम्भीर प्रकृतिको मुद्दाका थुनुवालाई प्रहरीले सुरक्षा दिएरै उपचार गराइरहेको हुन्छ। यिनीहरुको मुद्दा गम्भीरखालको नभएकाले अरु बिरामीसरह नै उपचार भइरहेको थियो,” पन्तले भनिन्, “राति भागेको भन्ने खबर प्रहरीले बिहान मात्र पाएको हो।”
उनले फरार संक्रमित थुनुवाको खोजी भइरहेको जानकारी दिइन्।