काठमाडौं– सभामुख अग्निप्रसाद सापकोटाले हरितालिका तीजको शुभकामना दिँदै स्वास्थ्य मापदण्डका नियमहरु पालना गरेर मनाउन आग्रह गरेका छन्।
शुक्रबार बिहान शुभकामना सन्देश दिँदै उनले कोरोना भाइरस (कोभिड–१९) को महामारीका कारण विगतमा जसरी यो पर्व मनाउने अवस्था नरहेको बताएका छन्।
“कोरोनाका कारण उत्पन्न महामारी दिनप्रतिदिन विस्तारित र जोखिमपूर्ण भइरहेको हामी सबैलाई विदितै छ,” उनले भनेका छन्, “तसर्थ, स्वास्थ्य मापदण्डका नियमहरु पालना गर्दै सतर्कताका साथ यो पर्व मनाउनु हुन अनुरोध गर्दछु।”
हरितालिका तीजको अवसरमा स्वदेश एवं विदेशमा रहेका सम्पूर्ण नेपाली दिदीबहिनीहरुमा हार्दिक शुभकामना व्यक्त पनि गरेका छन्।
“सामाजिक सद्भाव र पारिवारिक एकतामा थप मद्दत पुग्ने विश्वास लिएको छु,” उनले भनेका छन्, “यो पर्व सम्पूर्ण दिदीबहिनीको स्वतन्त्र, सुरक्षित र सम्मानपूर्ण जीवन यापन गर्नसक्ने वातावरण बनाउने बहसको अवसर पनि बनोस्।”