बाग्मतीमा ८० प्रतिशतभन्दा बढी कोरोना संक्रमित उपचाररत

काठमाडौं- बाग्मती प्रदेशमा ८० प्रतिशतभन्दा बढी कोरोना संक्रमित उपचार गराइरहेका छन्।

प्रदेशको सामाजिक विकास मन्त्रालयका अनुसार बाग्मतीमा बिहीबार साँझसम्म तीन हजार ७८४ जनालाई कोरोना पुष्टि भएकोमा तीन हजार ३५ जना अझै उपचार गराइरहेका छन्। यो बाग्मतीका कूल संक्रमित संख्याको ८०.२ प्रतिशत हो।

मन्त्रालयका अनुसार बाग्मतीमा बिहीबार साँझसम्म ७२४ जना कोरोनामुक्त भएका छन् भने २५ जनाको कोरोना संक्रमितको मृत्यु भएको छ।

बाग्मतीमा आज थप २०९ जनामा संक्रमण देखिएको मन्त्रालयले जनाएको छ। थपिएका संक्रमितमध्ये काठमाडौंमा १७४, ललितपुरमा १९, भक्तपुरमा ८, धादिङ तथा दोलखामा दुई/दुई र नुवाकोट, चितवन, काभ्रे, सिन्धुली र सिन्धुपाल्चोकमा एक/एक जना छन्।