‘विश्व मर्यादित महिनावारी दिवस’ मनाउन राष्ट्र संघलाई अनुरोध गरिने

काठमाडौं- सरकारले ‘विश्व मर्यादित महिनावारी दिवस’ मनाउन संयुक्त राष्ट्र संघलाई अनुरोध गर्ने तयारी गरेको छ।

महिला, बालबालिका तथा ज्येष्ठ नागरिक मन्त्री पार्वत गुरुङले मर्यादित महिनावारी दिवसलाई विश्वव्यापी रुपमा मनाउन संयुक्त राष्ट्र संघलाई अनुरोध गर्ने तयारी भइरहेको जानकारी दिए।

ललितपुरमा बुधबारमा आयोजित मर्यादित महिनावारी सम्बन्धी ‘भर्चुअल’ बैठकमा बोल्दै उनले सरकारले छिट्टै नेपाललाई ‘छाउगोठ मुक्त’ बनाउने घोषणा गरे।

‘नीति, कार्यक्रम र कार्यविधि बनाउने कामलाई अघि बढाइएको छ,’ उनले भने, ‘छाउगोठ जस्ता सामाजिक कुरीतिको अन्त्य गर्न नेपाललाई मर्यादित महिनावारीको देश बनाउने नीतिगत निर्णय गरिसकिएको छ।’ यसलाई कार्यान्वयनमा लैजान कार्यविधि बनाउने कामलाई अघि बढाएको उनको भनाइ छ।

‘सभ्य, सुन्दर र समुन्नत नेपाल निर्माण हुनेगरी सामाजिक क्षेत्रको कामलाई पनि राष्ट्रिय गौरवको आयोजनाको रुपमा अघि बढाउन सरकार लागि परेको छ,’ उनले भने, ‘सरकारको यस अभियानमा साथ, सहयोग र सुझावका लागि प्रदेश सरकार, स्थानीय सरकार र सामाजिक संघ, संस्थाहरुलाई आग्रह गर्दछु।’

समाजमा विद्यमान लैंगिक विभेद अन्त्यका लागि ‘लैंगिक मैत्री नीति’ निर्माण गर्ने कामलाई अघि बढाइएको उनले प्रष्ट पारे।