कोरोना नियन्त्रणको रणनीति बनाउन सीसीएमसीको बैठक बस्दै

काठमाडौं– कोरोना भाइरस (कोभिड–१९) को संक्रमण बढ्दै गएपछि आगामी रणनीति बनाउन कोभिड–१९ संकट व्यस्थापन केन्द्र (सीसीएमसी) को बैठक बस्दै छ।

हिजो सोमबार बालुवाटारमा बसेको मन्त्रिपरिषद् बैठकमा प्रधानमन्त्री केपी शर्मा ओलीले बिहीबारभित्रमा थप रणनीति तय गर्न सीसीएमसीलाई निर्देशन दिएका थिए।

प्रधानमन्त्रीको निर्देशनलगत्तै आज बैठक बस्न लागेको सीसीएसमीका संयोजक उपप्रधान तथा रक्षामन्त्री ईश्वर पोखरेलका स्वकीय सचिव दिपेन्द्र श्रेष्ठले जानकारी दिए। ‘कोभिड–१९ को संक्रमण बढ्दै गएपछि आवश्यक रणनीति बनाउन नै बैठक बस्न लागेको हो,’ उनले नेपाल समयसँग भने।

मंगलबार बस्ने बैठकले संक्रमण रोकथाम र नियन्त्रणका लागि अहिलेसम्म भइरहेको प्रयास र अब गर्नुपर्ने कामका बारेमा आवश्यक निर्णय गर्ने बुझिएको छ। बैठक आज साँझ सिंहदरबारस्थित प्रधानमन्त्री तथा मन्त्रीपरिषद्को कार्यालयमा बस्न लागेको हो।

संक्रमण रोकथामका लागि लकडाउन पुनः लागू गर्ने वा अन्य कस्ता योजना बनाउने भन्ने विषयमा छलफल हुनेछ। देशैभर संक्रमण बढेपछि जिल्ला प्रशासन कार्यालय र स्थानीय तहरुले नै निषेधाज्ञा गर्नेदेखि लकडाउनसम्म गरिरहेका छन्।

यसअघि बसेको मन्त्रिपरिषद्को नियमित बैठकले नै आफ्नो क्षेत्रको अवस्था हेरेर संक्रमण रोकथामका लागि सुरक्षाका उपाय अपनाउन स्थानीय तहलाई र जिल्ला प्रशासन कार्यालयहरुलाई अधिकार दिएको थियो।