वीर अस्पतालको टिकट काउन्टरका कर्मचारीलाई कोरोना संक्रमण

काठमाडौं– वीर अस्पतालको टिकट काउन्टरमा कार्यरत एक कर्मचारीलाई कोरोना पुष्टि भएको छ।

अस्पतालका चिकित्सक तथा कोभिड–१९ संयोजक डा. विधान निधि पौडेलका अनुसार हालसम्म अस्पतालमा ३ जना चिकित्सकसहित ७ जना कर्मचारीमा कोरोना पुष्टि भएको छ।

संक्रमितलाई सुरक्षित तरिकाले आइसोलेसनमा राखेर अस्पतालका अन्य सेवाहरु सहज रुपमा सञ्चालन भएको डा. पौडेलले जानकारी दिए।

उनका अनुसार संक्रमित कर्मचारीसँग काम गरेका वा सम्पर्कमा आएका अन्य कर्मचारीहरुको पीसीआर गर्ने तयारी गरिएको छ। यसअघि आइतबार अस्पतालको सरसफाइमा खटिएका एक कर्मचारीमा पनि कोरोना संक्रमण देखिएको थियो।

त्यसअघि तीन जना चिकित्सक र एक जना नर्स, एक जना सवारी चालकमा समेत संक्रमण देखिइसकेको छ।