काठमाडौं– रक्षा मन्त्रालयले नेपाली सेनाबीच कुनै पनि विषयमा कुनै प्रकारको विवाद तथा मतभेद नरहेको प्रष्ट पारेको छ।
रक्षा मन्त्रालयका प्रवक्ता सहसचिव कृष्णप्रसाद ज्ञवालीले विज्ञप्ति जारी गर्दै सञ्चारमाध्यममा कपोलकल्पित, भ्रामक र मनगढन्ते तरिकाले समाचार आएको भन्दै मन्त्रालयको गम्भीर आपत्ति रहेको जनाएका छन्।
“नेपाली सेनाको अनुरोधलाई नेपाल सरकार, रक्षा मन्त्रालयले सदैव प्राथमिकतामा राखी कार्य फर्स्यौट गर्ने व्यवस्था अंगिकार गर्दै आएको व्यहोरा सम्बन्धित सबैलाई स्पष्ट पारिन्छ,” विज्ञप्तिमा भनिएको छ।
उपप्रधानमन्त्री तथा रक्षामन्त्री र नेपाली सेनाका प्रधानसेनापतिबीच नियमित भेटघाट चलिरहेको र आवश्यकतानुसार नीतिगत विषयमा छलफल परामर्श भइरहेको पनि मन्त्रालयले जारी गरेको विज्ञप्तिमा भनिएको छ।
रक्षा मन्त्रालय र नेपाली सेनाजस्तो राज्यको संवेदनशील जिम्मेवारी निर्वाह गरिरहेको संगठनका विषयमा तथ्यहीन र मनगढन्ते समाचार प्रकाशन गर्दा सरकार र नेपाली सेनाबीच रहेको अत्यन्त सौहार्द्रपूर्ण सम्बन्धलाई अनावश्यक विवादमा ल्याउने तथा यसबाट नेपाली सेनाको मनोबलमा समेत ह्रास ल्याउन सक्ने हुँदा यसतर्फ संवेदनशील रहन भनिएको छ।
उपप्रधानमन्त्री तथा रक्षामन्त्री, रक्षा मन्त्रालय र नेपाली सेनाबीचको सम्बन्धलाई लिएर केही दिनयता विभिन्न सञ्चार माध्यमहरूमा सुनियोजित तवरले प्रकाशित मनगढन्ते र तथ्यहीन समाचारप्रति मन्त्रालयको गम्भीर ध्यानाकर्षण भएको विज्ञप्तिमा उल्लेख छ।
कोभिड–१९ को रोकथाम, नियन्त्रण र उपचारका लागि आवश्यक पर्ने औषधी, उपकरण तथा अन्य सामग्रीहरु रक्षा मन्त्रालयले नेपाली सेनामार्फत चीन सरकारबाट जीटूजी विधिबाट खरिद गरी ल्याउने भन्ने सम्बन्धमा मन्त्रिपरिषदबाट निर्णय भए अनुसार नेपाली सेनाले सबै प्रक्रिया अपनाएर चीन सरकारले तोकेको सरकारी निकायबाट खरिद गरेको रक्षा मन्त्रालयले जनाएको छ।
१६ साउन २०७७ मा रक्षा मन्त्रालयको वार्षिक प्रगति समीक्षा तथा मन्त्रालयस्तरीय विकास समस्या समाधान समितिको बैठकमा उपप्रधानमन्त्री तथा रक्षामन्त्री ईश्वर पोखरेल र प्रधानसेनापति पूर्णचन्द्र थापाबीच आरोप–प्रत्यारोप भएको भनी कतिपय सञ्चार माध्यममा आएको समाचारमा कुनै सत्यता नभएको विज्ञप्तिमा उल्लेख छ।