काठमाडौं– बाग्मती प्रदेश प्रहरी कार्यालयअन्तर्गत जिल्ला प्रहरी कार्यालय, सिन्धुलीमा कार्यरत दुई जना प्रहरीलाई निलम्बन गरिएको छ।
जिल्ला प्रहरी कार्यालय, सिन्धुलीले उनीहरुलाई निलम्बन गरेको बाग्मती प्रदेश प्रहरी कार्यालयले विज्ञप्तिमार्फत जानकारी दिएको छ।
बा ६ ख ५५६३ नम्बरको सवारी साधनसँग रकम लिएको भन्ने उजुरीको आधारमा अनुसन्धान हुँदा रकम लिएको पुष्टि भएपछि थप छानबिनको लागि उनीहरुलाई निलम्बन गरिएको हो।
निलम्बन पर्नेमा इलाका प्रहरी कार्यालय, भिमानमा कार्यरत प्रहरी हबल्दार कमलबहादुर खड्का र प्रहरी चौकी, ढुंग्रेबासमा कार्यरत प्रहरी जवान वीरबहादुर प्रसाद यादव छन्।
जिल्ला प्रहरी कार्यालय, सिन्धुलीले प्रहरी नायब उपरीक्षकको संयोजकत्वमा निजहरुउपर थप छानबिन गर्न समिति गठन गरेको छ।
बाग्मती प्रदेश प्रहरी कार्यालयले इमान्दारीपूर्वक डियुटी गर्ने प्रहरी कर्मचारीहरुलाई पुरस्कृत गर्ने र गैह्रव्यवसायिक कार्यमा संलग्नलाई कारवाही गर्दै आइरहेको छ।
प्रदेश प्रहरी प्रमुख एवं प्रहरी नायब महानिरीक्षक वसन्तकुमार लामाले विशेष कार्ययोजना बनाइ मातहत प्रहरी कर्मचारीहरुबाट सम्पादन भइरहेको कार्यलाई अनुगमन र मूल्यांकन गर्न सिनियर प्रहरी अधिकृतको कमाण्डमा टाक्स फोर्स गठन गरेका छन्।
सेवाग्राहीसँग आर्थिक प्रलोभनमा परेको अभियोगमा एक जना प्रहरी निरीक्षकसहित १३ जना प्रहरी कर्मचारी निलम्बित भइसकेका छन्। भने इमान्दारितापूर्वक डियुटी गर्ने २५ जना प्रहरी कर्मचारी पुरस्कृत भएका छन्।