काठमाडौं- भरतपुर अस्पतालका मेडिकल सुपरिटेण्डेन्टसहित पाँच जनालाई कोरोना भाइरस संक्रमण पुष्टि भएको छ। अन्य संक्रमितमा तीन चिकित्सक र एक स्वास्थ्यकर्मी छन्।
उनीहरुलाई शनिबार अबेर राति कोरोना संक्रमण पुष्टि भएको अस्पतालका सूचना अधिकारी लीलाधर पौडेलले जानकारी दिए। उनीहरुको अवस्था सामान्य रहेको बताइएको छ।
अस्पतालमा कार्यरत चिकित्सकलाई कोरोना संक्रमण देखिएपछि अस्पतालको आकस्मिक कक्षको सेवा हिजो राति ८ बजेदेखि स्थगित गरिएको सूचना अधिकारी पौडेलले जानकारी दिए।
“अस्पताल निर्मलीकरण गर्नका लागि तत्कालका लागि सेवा स्थगित गरिएको छ, केही घन्टापछि पुनः सेवा सुचारु हुनेछ,” उनले भने।
यसअघि गत बिहीबार अस्पतालमा कार्यरत नर्समा कोरोना संक्रमण पुष्टि भएको थियो। नर्सलाई कोरोना संक्रमण देखिएपछि गत शुक्रबार आकस्मिक कक्ष सिल गरिएकोमा हिजो राति ८ बजेदेखि सेवा सञ्चालन गरिएको सूचना अधिकारी पौडेलले जानकारी दिए।