काठमाडौं– सिन्धुपाल्चोकको जुगल गाउँपालिका–२, लिदीमा पहिरोमा पुरिएर मृत्यु भएका ११ जनाको सनाखत भएको छ।
शुक्रबार बिहान गएको पहिरोमा बेपत्ता भएका मध्ये ११ जनाको शव भेटिएको थियो। अझै २७ जना पहिरोमा पुरिएर बेपत्ता छन्। उनीहरुको खोजी शनिबार पनि जारी राखिएको छ। जिल्ला प्रहरी कार्यालय, सिन्धुपाल्चोकका अनुसार पाँच बालक, चार पुरुष र दुई महिलाको शव भेटिएको हो।
सिन्धुपाल्चोकका प्रहरी प्रवक्ता एवं डिएसपी माधवप्रसाद काफ्लेका अनुसार पहिरोमा परी ज्यान गुमाउनेमा टीकामाया दोङ, छिरिङ दोङ, जिताई झाँक्री, मिलन दोङ, सानु दोङ, जयबहादुर दोङ, दावा ल्हामु दोङ, तारल्हमो दोङ, पिर्ती दोङ, धनमाया दोङ र रिमेक्स दोङ छन्। ११ जनाकै सामूहिक दाहसंस्कार गरिने भएको छ।
जुगल गाउँपालिका उपाध्यक्ष सिर्जना तामाङले पहिरोबाट प्रभावित भएका ४० घरका लागि आवश्यक त्रिपाल, खाद्यान्नको व्यवस्था गरिएको जानकारी दिइन्।
गृहमन्त्री रामबहादुर थापा राहत सामग्री लिएर शुक्रबार नै घटनास्थल पुगेका थिए।
जिल्ला विपद व्यवस्थापन समितिबाट ३७ घरका लागि प्रतिघर १५ हजार रुपैयाँ सहयोग गरिएको छ। पहिरो निरिक्षणका लागि शुक्रबार बिहान सभामुख अग्निप्रसाद सापकोटा पनि लिदी पुगेका थिए।