काठमाडौं– अपहरण तथा शरीर बन्धक कसुरमा रामेछापको लिखु तामाकोशी गाउँपालिकाका अध्यक्ष गोविन्द खड्का पक्राउ परेका छन्।
जिल्ला प्रहरी कार्यालय रामेछापले उनलाई आज पक्राउ गरेको प्रहरी प्रवक्ता प्रहरी निरीक्षक टेकेन्द्र शर्मा पौडेल जानकारी दिए।
‘अपहरण तथा शरीर बन्धक सम्बन्धी कसुरमा जाहेरी परेको थियो,’ उनले भने,‘ हामीले अदालतबाट पक्राउ पुर्जी लिएका थियौं। आज पक्राउ गरेका हौं।’
प्रहरी हिरासतमा राखेर थप अनुसन्धान शुरू गरिएको उनले जानकारी दिए। उपभोक्ता समितिका दर्पण घिसिङलाई बन्धक बनाएर चेकमा सही गर्न लगाएको भन्दै खड्काविरुद्ध जाहेरी परेको थियो।
स्थानीय तहको निर्वाचनमा खड्का तत्कालीन नेकपा एमालेबाट निर्वाचित भएका थिए। अपहरण मुद्दा लागेपछि नेकपाले उनलाई निलम्बन गरेको थियो।