विराटनगर– कोरोना भाइरस (कोभिड-१९) संक्रमितको संख्या बढ्दै गएपछि विराटनगर महानगरपालिकाले आगामी भदौ ५ गते सम्मका लागि लकडाउन थप गरेको छ।
महानगरपालिकास्तरीय कोभिड–१९ संकट व्यवस्थापन केन्द्र (सीसीएमसी)को बिहीबार बसेको बैठकले अत्यावश्यक बाहेकका सबै सेवाहरु भदौ ५ गते राति १२ बजेसम्मका लागि बन्द गर्ने निर्णय गरेको हो।
यसअघि महानगरपालिकाले पहिलो पटक साउन १६ गते मध्यरातिदेखि साउन ३० गतेसम्मका लागि लकडाउन घोषणा गरेको थियो।
विराटनगरमा कोरोना संक्रमण बढेकाले लकडाउन थप गरिएको महानगर प्रमुख भीम पराजुलीले जानकारी दिए। विराटनगरमा बिहीबारसम्म ४१४ जना कोरोना संक्रमित भएका छन्। यस्तै, ६९ जना डिस्चार्ज भएका छन् ।
मोरङका १४ स्थानीय तहमा लकडाउन
मोरङका १४ स्थानीय तहमा लकडाउन गरिएको छ। जिल्लामा कोरोना संक्रमण बढ्दै गएपछि विराटनगरसहित सुन्दरहरैचा, बेलबारी, पथरी शनिश्चरे, उर्लाबारी, रतुवामाई, सुनवर्षी, रंगेली, धनपालथान, जहदा, कटहरी, बुढीगंगा, केराबारी, मिक्लाजुङले लकडाउन गरेका छन्।