काठमाडौं- कञ्चनपुरको महेन्द्रनगर बजारको मुख्य क्षेत्रमा बुधबार राति बम भेटिएको छ। जिल्ला प्रहरी कार्यालय, कञ्चनपुरका अनुसार प्रेसर कुकर बम भेटिएको हो।
भीमदत्त नगरपालिका–४, मा रहेको सब्जीमन्डी नजिकै भेटिएको बम बिहीबार बिहानै नेपाली सेनाको टोलीले निष्क्रिय पारेको छ।
बम भेटिएको स्थानमा थारुवान स्वायत्त प्रदेश जिल्ला परिषद्, कञ्चनपुरको पर्चा भेटिएको जिल्ला प्रहरी कार्यालयका डीएसपी अमरबहादुर थापाले जानकारी दिए। “बम राति २ बजेतिर राखेको अवस्थामा भेटिएको हो,” थापाले भने, “यस विषयमा थप अनुसन्धान भइरहेको छ।”
पर्चामा महेन्द्रनगर नगर विकास समितिको जमिनमा अवैधरूपमा निर्माण भइरहेका संरचनाको विरोध गरिएको छ।
लिजका नाममा करोडौं मूल्य पर्ने जमिन लिएर भौतिक संरचना निर्माण गरिएको विषयमा यसअघि प्रतिबन्धित नेत्रविक्रम चन्द समूहले पनि विरोध जनाउँदै आइरहेको छ।